الجزء الأول من خامس حلقات أبيض وأسود .. ابنة هند رستم تكشف سر عن مدرسة المشاغبين
تكشف بسنت حسن رضا، ابنة الفنانة الراحلة هند رستم خلال حديثها مع برنامج أبيض وأسود، الذي يقدمه الناقد الفني محمد شوقي، ويعرض عبر منصات آخر خبر TV، عن أسرار جديدة في حياة والدتها الفنية واخصة اعتذارها عن فيلم أبي فوق الشجرة ومسرحية مدرسة المشاغبين، وكذلك سبب خوفها من تأدية فريضة الحج، وغيرها من الأمور الأخرى.
سبب اعتذار هند رستم عن مدرسة المشاغبين
وقالت بسنت حسن رضا من قبل عن سبب اعتذار والدتها عن مسرحية مدرسة المشاغبين : المسرحية كانت مكتوبة ليها، وهي المفروض كانت تقدم شخصية أبلة عفت، وهي خافت تقف قصاد أبطالها وقالت دول ممكن ياكلوني على المسرح، كمان هي مش بتحب تقدم عروض على المسرح لأنها بتستمر لشهور وسنين.
وتابعت : لو كان العرض لمدة شهر بس كان ممكن توافق على مدرسة المشاغبين، لكن الدور راح لغيرها رغم إنه كان مرسوم عليها والمفروض إنهم بيعاكسوها.
خوف هند رستم من الحج
وقالت بسنت حسن رضا : ماما كانت بتخاف من الزحمة وبتحس بصعوبة في التنفس في الأماكن الزحمة، وقررت إني في البداية أطلعها عُمرة، وسافرنا أنا وهي وابني، واتبسطت جداً بالعمرة دي، ولما جينا وقت الحج قولتلها إني حجزت وهنطلع أنا وإنتي، وكان الحجز 21 يوم، وطلعنا بعد تردد وحست إنها اتغسلت من جواها بعدها واتبسطت جداً.
زملكاوية متعصبة
وقالت بسنت حسن رضا : ماما كانت زملكاوية جداً ومتعصبة، وإحنا كنا كلنا أهلاوية، وابني وهو صغير كان أهلاوي، لكنها أقنعته يغير لنادي الزمالك، وتابعت : لما بيكون مباراة بين الأهلي والزمالك كانت بتخرج تتفرج على الماتش برا البيت لأننا كلنا أهلاوية.
سبب اعتذار هند رستم عن أبي فوق الشجرة
وقالت بسنت حسن رضا : هند رستم رفضت تقدم فيلم أبي فوق الشجرة لأنها كانت رافضة مشهد معين والمخرج كان مُصر عليه، وهي قالت لأ مش هعمله، وتابعت : الأجر في الفيلم كان كويس جداً، لكن لأنها كانت لسه مخلصة فيلم شفيقة القبطية، وكانت مش عايزة تقدم الفيلمين دول ورا بعض.
لقب ملكة الإغراء
وقالت بسنت حسن رضا : ماما كانت بتضايق جداً من لقب ملكة الإغراء جداً، لأنه مش حلو، وهي مثلت حاجات كتيرة جداً بعيداً عن النوعية دي من الأدوار، وتابعت : أنا أفضل ليها لقب الجوكر لأنها كانت بتقدم كل حاجة الكوميديا ودراما طبعاً.
مسيرتها الفنية
قدمت هند رستم أكثر من 74 فيلم سينمائي، أبرزهم : أنا وابنتي والحب، حدث ذات ليلة، الجبان والحب، بنات حواء، صراع في النيل، الراهبة، شفيقة القبطية، وقدمت آخر أعمالها عام 1979 في فيلم حياتي عذاب، وقررت الاعتزال بعده مباشرة.
