امتى اكتشتفي إنك هتنجحي؟ .. ياسمين ثروت توضح

حلت ياسمين ثروت، رائدة الأعمال العربية، ضيفة على برنامج Mini Talks، الذي تقدمه الإعلامية هند رضا، على جميع منصات آخر خبر TV، وتحدثت خلال اللقاء عن شعورها بالنجاح، والحدث الذي قالت لنفسها فيه برافو، ومتى شعرت أنها ستنجح في عملها.

امتى اكتشتفي إنك هتنجحي؟

وقالت ياسمين ثروت، رائدة الأعمال العربية : بعد أول إيفينت عملناه وقت الكورونا، مكنش عندي ولا فريق عمل ولا معايا ناس، ولا بفهم في أي حاجة خالص، لكن لما جاتلي الفرصة أبدعت واكتشفت إني شاطرة، وده إداني دافع إني هكمل وليا بصمة، وحسيت إن الناس عايزة تجيلي وإني مؤثرة وبهتم بالتفاصيل ومجتهدة في شغلي ومع أولادي، وكل حاجة بحاول أعملها على أكمل وجه.

سر النجاح

وتحدثت ياسمين ثروت، رائدة الأعمال العربية من قبل عن سر النجاح في حياتها، وقالت: العطاء أهم الحاجات اللي اتعلمتها من أمي، أما الكبرياء دي حاجة بشعة بحاول أهرب منه خالص، وقيمتي في أمانتي لو مش هعرف أعمل إيفنت دلوقتي بكون صريحة، وممكن حد يقول ليه لا ما أنتي هتكسبي منه، لكن أنا بكون أمينة وبقول ما ينفعش، لأني أنا ببص للعميل كعلاقة طويلة وممتدة، والولاء والصفة بيولد التكرار، وتابعت : خلال رحلتي القصيرة في ريادة الأعمال اكتشفت أن النجاح الحقيقي مش اللي بنحققه لنفسنا ولكنه الأثر اللي بنصنعه في حياه الأخرين، ريادة الأعمال مش مشروع أو استثمار فقط، ولكنها رسالة إنسانية.

الساحل وجهة عالمية

وتحدثت ياسمين ثروت من قبل عن الساحل كوجهة عالمية، وقالت : من 3 سنين فقط من العمل في مدينه العلمين الجديدة، محدش يتخيل كل التقدم اللي بقت فيه دلوقتي، وتابعت : عملنا فاشن شو لـ مايكل سينكو من دبي مستوحى بالكامل من الفراعنة، وده من أغلى الإيفنتات على قلبي وكنت فخورة جداً إن حاجة زي دي تحصل في العلمين الجديدة، ومن زمان كنا شايفين اللي بيحصل ده دلوقتي هيحصل وأكتر وأكتر.

أجمل شاطئ البحر المتوسط

وأضافت : الساحل مفيش زيه، وهو من أجمل شواطئ البحر المتوسط، وأنا دايماً بشوف بلدي أحسن بلد وأحلى بلد، وطبعا لو اهتمينا بالخطوات اللي المطورين ماشيين فيها دلوقتي، وكل الفعاليات اللي بتحصل مصر هتكون في حتة تانية خالص، استثمارات وسياحة ووجهة عالمية، وأنا كل الناس دلوقتي بيكلموني من كل البلاد العربية وأمريكا والعالم كله عايزين ييجوا، لأن بالنسبة لهم الساحل ده مفيش زيه.

تفاصيل مبادرة يلا ساحل

تم الإعلان مؤخراً، عن إطلاق مبادرة يلا ساحل، التي تجمع كبرى شركات التطوير العقاري تحت مظلة موحدة، في خطوة تعكس تكامل وتوحيد جهود القطاع لتعزيز مكانة الساحل الشمالي كوجهة سياحية وترفيهية واستثمارية عالمية، وجاء الإعلان خلال مؤتمر صحفي استضافه G Hotel سيدي عبدالرحمن، بحضور نخبة من كبار المطورين العقاريين، ورجال الأعمال، وصناع القرار، إلى جانب عدد من الإعلاميين والشخصيات العامة.