عمرو محمود ياسين : قصة وننسى اللي كان معايا من 3 سنين وكنت هعملها فيلم
يواصل السيناريست عمرو محمود ياسين حديثه مع آخر خبر TV، وكشف عن كواليس التحضير لمسلسل وننسى اللي كان، وكيف أقنع ياسمين عبدالعزيز بالفكرة، وسبب تحويله من السينما للدراما، وكيف بدأ التحضير له منذ 3 سنوات.
بدات التحضير لمسلسل وننسى اللي كان من 3 سنين
وقال عمرو محمود ياسين : مسلسل وننسى اللي كان معايا من 3 سنين، وكان في البداية فيلم، وحكيت قصة الفيلم لـ كريم فهمي، وعجبه جداً وقته.
وتابع : بعدها وأنا بتكلم مع ياسمين عبدالعزيز في التليفون، قالتلي هنعمل إيه، قولتلها أنا عندي سطر كده كنت عايز أعمله فيلم، وعجبتها الفكرة، واشتغلناها على طول، وأنا من البداية كنت محدد الركائز كلهامن البداية للنهاية.
رسالة دعم لزوجته
وكان قد تحدث عمرو محمود ياسين، من قبل عن مرض زوجته، وقال في تصريح خاص : الموضوع ده أصعب حاجة مريت بيها في حياتي، وبالنسبة لي إنها تمر باللي بتمر بيه ده أصعب اختبار، وعندي ثقة كبيرة في ربنا إن الفترة دي تعدي على خير، لأنها توأم روحي، وأنا بقولها إن شاء الله تبقى زي الفل.
وتابع : إحنا كنا خلصنا علاج، وابتدينا نشوف إيه الموقف، ولقينا لسه في حاجة فاضلة، وأضاف : أنا لقيت إني بعد كل عمل كبير بحصلي حاجة غريبة جداً، من زمان في مسلسل ونحب تاني ليه حد ضرب عليا نار علشان يسرق عربيتي، وفي مسلسل اللي ملوش كبير والدي اتوفي، وفي نصيبي وقسمتك عملت حادثة، ومرة ابني محمود في نصيبي وقسمتك تعب ومكناش عارفين سبب مرضه.
تفاصيل مسلسل وننسى اللي كان
ودارت أحداث مسلسل وننسى اللي كان، حول جليلة رسلان الممثلة - ياسمين عبدالعزيز- التي تجد نفسها محاصرة في شباك تهديد غامض يحول حياتها لساحة مطاردة؛ وهنا يتقاطع طريقها مع بدر - كريم فهمي -، الحارس الشخصي لها، ومع تصاعد وتيرة الخطر، تذوب الحدود بين الواجب والمشاعر، ليتحول بدر من درع واق لشريك في معركة عشق لا تخضع لقواعد الفنون القتالية، حيث يصبح الحفاظ على الحب أصعب من الحفاظ على الحياة.
أبطال مسلسل وننسى اللي كان
مسلسل وننسى اللي كان، من تأليف عمرو محمود ياسين وإخراج محمد الخبيري، وبطولة ياسمين عبدالعزيز، كريم فهمي، شيرين رضا، إيهاب فهمي، منة فضالي، خالد سرحان، محمد لطفي، محمود حافظ، منة عرفة، ليلى عز العرب، محمود عزب، عمر شرقي، أسما سليمان وآخرين، و الذي عرض عبر قناة MBC مصر في موسم رمضان 2026، ليكون بذلك أول ظهور لـ ياسمين عبدالعزيز بعمل من بطولتها على شاشة القناة في موسم رمضان.
