الجزء الثاني من ثاني حلقات أبيض وأسود .. أسرار اللحظات الأخيرة في حياة إسماعيل ياسين
كشفت ميرفت إسماعيل ياسين، ابنة إسماعيل ياسين بالتبني، عن أسرار جديدة عن والدها الراحل، في الجزء الثاني من الحلقة الثانية من برنامج أبيض وأسود، تقديم الناقد الفني محمد شوقي، والذي يعرض عبر منصات آخر خبر TV، وتحدثت عن علاقته بعدد من النجوم، وزيجاته في بداية حياته، كما تحدثت ميرفت عن زواجها من بهجت قمر وسبب رفض والدها هذه الزيجة، كما كشفت كواليس آخر يوم قبل وفاته.
رياض القصبجي مكنش صديق بابا
وقالت ميرفت إسماعيل ياسين خلال اللقاء : أنا مشوفتش رياض القصبجي في البيت عندنا، ومكنوش أصدقاء زي محمود المليجي وعبدالسلام النابلسي، وتابعت : تقريباً علاقتهم كانت شغل بس، وعمري ما شوفته على الحقيقة.
وأضافت : لكن هو أكيد كان بيجيله زمان وأنا مشوفتوش، ومش فاكرة توفي سنة كان هو وعبدالفتاح القصري، وفاكرة بابا ياسين لما جاتلة مياه على الرئة، وكان محجوز وقتها في مستشفى المواساة، وفي الفترة دي ممكن يكون زاره.
قصة زواجها من بهجت قمر
وقالت ميرفت إسماعيل ياسين، عن زواجها : بهجت قمر كان عندنا في البيت على طول، وطلبني للزواج من بابا إسماعيل ياسين، وهو كان صديقه جداً لكنه رفض في البداية بسبب فرق السن الكبير بينا، وكان تقريباً 20 سنة، وكان بيقوله أنت كبير قوي عليها، ووتابعت : اتجوزنا بعد وفاة بابا، لكن لو كان هو مش بيحبه أو رافضه مكنتش اتجوزته طبعاً.
بابا مات مستور
وقالت ميرفت إسماعيل ياسين : بابا مات مستور، ومسابش حاجة غير العمارة اللي كان عليها 70 ألف جنيه للضرائب، وماما وياسين باعوها، وسددوا فلوس الضرائب وأخدوا الباقي، وتابعت : فنانين زمان مكانوش بيفكروا في بكرة في فنانين الأيام دي، ولا بيشغلوا دماغهم إيه اللي هيحصل بكرة.
أزمة إسماعيل ياسين مع رجال عبدالناصر
وعن أزمة إسماعيل ياسين مع رجال عبدالناصر، وحقيقه خلافه معه، قالت ميرفت : بابا زعل لما عبدالناصر مات، لأن خلافه كان مع رجال عبدالناصر، ووقتها مسحوا مسرحياته كلها حوالي 60 مسرحية، وحطوا مكانها مباريات كرة قدم.
وتابعت : ده كان علشان يرضوا فنان ما طالع جديد ويفضوا له الساحة، لكن إسماعيل ياسين ماشتكاش، وكمان الرئيس عبدالناصر كان مشغول في أمور البلد والحروب، مشكلته كانت مع المسؤولين عن الثقافة في البلد وقتها.
كواليس آخر يوم قبل وفاته
وقالت ميرفت إسماعيل ياسين : لما اتوفي فطين عبدالوهاب، بابا وقتها مكنش طايق نفسه، ووقتها كان بيصور فيلم الرغبة والضياع، وقالهم معلش هسافر كام يوم إسكندرية قالوله ماشي، هنصور مشاهد تانية لحد ما ترجع، ووقتها سافر مع أخويا عادل، وقعدوها هناك 10 أيام.
وتابعت : لما رجعوا كان يوم تلات، كنت أنا وماما وياسين، وطلب أيس كريم، ونزلنا جبنا من جروبي، وأكل أيس كريم، ووقتها قالي أنا حاسس إني هموت، قولتله ليه بتقول كده، قالي سامحيني المفروض كنت أكتبلك شقة في العمارة بإسمك، ودهنتله رجله ونام.
