محمد عبدالرحمن : أنا يونس شلبي في العيال كبرت
واصل محمد عبدالرحمن خلال حواره مع آخر خبر TV حديثه عن أبرز المسرحيات الكوميدية التي يفضل مشاهدتها في عيد الأضحى، وكشف عن الأعمال الأقرب إلى قلبه من الكلاسيكيات مثل العيال كبرت ومدرسة المشاغبين وشاهد ماشفش حاجة، وذلك ضمن لقاء خاص يُعرض خلال العيد.
المسرحيات الأقرب لقلبه في العيد
قال محمد عبدالرحمن ردًا على سؤال حول المسرحيات الأقرب له : المسرحيات كلها حلوة أوي، حرام أظلم واحدة منهم، المشكلة إن هما كلهم فعلاً بيعبروا عن العيد.
وأضاف : الحلو بقى في المنصات اللي طالعة إنك تقدر تقسمهم كل يوم، بس أنا كنت بحب في العيد شاهد ماشفش حاجة أوي أوي، والعيال كبرت طبعًا، والمشاغبين، وسك على بناتك وعش المجانين، هم دول العيد.
وتابع : زمان كانوا بيقسموهملنا على عيدين، في العيد الكبير كانت تيجي عش المجانين والعيال كبرت وسك على بناتك، وفي العيد الصغير شاهد ماشفش حاجة ومدرسة المشاغبين.
وأردف : كان في مسرحية كمان بتاعت شيريهان عشان خاطر عيونك، وكان دايمًا في العيد الصغير بيتعرضوا حاجات زي دي، وكمان فيلم الشعلة الهندي في رابع يوم العيد، وكنا منبهرين بيه جدًا.
شاهد ما شفش حاجة .. المسرحية المفضلة
وقال : شاهد ما شفش حاجة، حلوة أوي لأنها مسرحية صعبة جداً، وان مان شو يعتبر، طبعاً فيها أساتذة عظام، بس الجزء الأكبر كان على الزعيم، والإخراج فيها خطير، الدكتور هاني مطاوع الله يرحمه، خطير بجد، كان عامل دخلة الأستاذ عادل إمام مفتحش فيها بقه والناس ميتة على روحها من الضحك، وهو داخل حديقة الحيوان بالـ أكياس، ومشهد التليفزيون، والجثة لما اكتشفوها، الرقاصة وبتاع والتحقيقات، فهي مسرحية خطيرة وصعبة جداً يعني.
أبطال العيال كبرت الجدد
وتابع عن فكرة إعادة تقديم العيال كبرت : لو هيتعمل دلوقتي، أنا ممكن أكون يونس شلبي، وممكن عصام عمر يبقى أحمد زكي، وجيهان الشماشرجي تكون البنت، وسعيد صالح ممكن يبقى مصطفى غريب أو مصطفى خاطر أو أوس أوس، وعلي ربيع، وفيه كذا اختيار ينفع.
واختتم : حسن مصطفى صعب يتكرر، وكمان كريمة مختار مفيش حد مكانهم، أدوار شبه مستحيلة تتعمل تاني بنفس الشكل.
أحدث أعمال محمد عبدالرحمن
وانتهى محمد عبدالرحمن توتا مؤخراً من تصوير فيلمه الجديد 101 مطافي، والذي يشاركه بطولته محمد أسامة أوس أوس، وتدور أحداثه في إطار كوميدي اجتماعي.
فيلم بيج رامي
وينتظر محمد عبدالرحمن توتا أيضاً عرض فيلم بيج رامي، الذي يشارك في بطولته إلى جانب رامز جلال، والذي يسجل التعاون الثاني بينه وبين رامز جلال في السينما، بعدما اجتمعاً سوياً في فيلم سبع البرمبة الذى تم عرضه عام 2019.
