حكاية اليوم الأخير في حياة إسماعيل ياسين
تواصل ميرفت إسماعيل ياسين، ابنة إسماعيل ياسين بالتبني، حديثها عن والدها الراحل، خلال برنامج أبيض وأسود، تقديم الناقد الفني محمد شوقي، والذي يعرض عبر منصات آخر خبر TV، وتحدثت خلال اللقاء عن كواليس اليوم الأخير في حياته.
كواليس آخر يوم قبل وفاته
وقالت ميرفت إسماعيل ياسين : لما اتوفي فطين عبدالوهاب، بابا وقتها مكنش طايق نفسه، ووقتها كان بيصور فيلم الرغبة والضياع، وقالهم معلش هسافر كام يوم إسكندرية قالوله ماشي، هنصور مشاهد تانية لحد ما ترجع، ووقتها سافر مع أخويا عادل، وقعدوها هناك 10 أيام.
وتابعت : لما رجعوا كان يوم تلات، كنت أنا وماما وياسين، وطلب أيس كريم، ونزلنا جبنا من جروبي، وأكل أيس كريم، ووقتها قالي أنا حاسس إني هموت، قولتله ليه بتقول كده، قالي سامحيني المفروض كنت أكتبلك شقة في العمارة بإسمك، ودهنتله رجله ونام.
مات على إيدي
وأضافت : يوم الوفاة ياسين دخل يذاكر مع مدحت السباعي، وماما قالتلي ادخلي مع أبوكي شكله تعبان، ولقيته بيلف يفتح نور الشقة كله، قولتله ليه بتنور الشقة، قالي هو أنا هدفع حاجة، وقعد على الأرض، ومد رجليه ونام على دراعي وفجاة لقيتهبيتوفى.
إسماعيل ياسين جاله شلل نصفي بسبب الضرائب
وتحدثت ميرفت إسماعيل ياسين من قبل عن إصابته بالشلل المؤقت بسبب الضرائب، وقالت : الضرايب كانت حوالي 71 ألف جنيه، واتسددت بالكامل، لأن بعد وفاة إسماعيل ياسين، ابنه ياسين عرض العمارة بتاعته للبيع، وده كان سنة 1972، ومشكلة الضرايب كانت من سنة 1964.
وتابعت : زمان كانوا مش بيشيلوا هم بكرة وبيصرفوا مش زي فنانين دلوقتي بيعملوا مشاريع جنب فنهم، ووقتها إسماعيل ياسين جالة شلل نصفي بسبب الحجز على أملاكه، لكن الشلل قعد 3 أيام، لكن حل الفرقة تعبه نفسياً.
مسيرة إسماعيل ياسين
بدأ إسماعيل ياسين مسيرته الفنية كمطرب متأثراً بـ محمد عبدالوهاب، بالغناء في الأفراح والمقاهي الشعبية، قبل أن ينتقل إلى القاهرة وينضم لفرقة بديعة مصابني، ثم عمل بفرقة علي الكسار كمطرب، ومونولوجست وممثل لسنوات، وظهر ياسين سينمائياً لأول مرة عام 1939 في فيلم خلف الحبايب، لتبدأ رحلة صعوده من أدوار هامشية، إلى بطولة أفلام حملت اسمه في عناوينها.
فرقته المسرحية
وأسس إسماعيل ياسين فرقته المسرحية عام 1954، واستمرت ما يقرب من 12 عاماً، قدم خلالها أكثر من 50 مسرحية، وساهم من خلالها في كتابة تاريخ المسرح الكوميدي المصري.
