عزيز الشافعي : أحمد عز وكريم عبدالعزيز شرفونا في 7dogs
تحدث الملحن والشاعر عزيز الشافعي، على هامش العرض الخاص لفيلم 7dogs وفي لقاء خاص لـ آخر خبرTV، وجه كلمة إلى المستشار تركي آل الشيخ وأبطال العمل أحمد عز وكريم عبد العزيز، كما تحدث عن أغنيته في الفيلم.
7Dogs نقلة في الإنتاج السينمائي
وقال الشافعي: شكراً على النقلة في الإنتاج السينمائي اللي حصلت في الصناعة في Middle East الفترة اللي فاتت، مش بس فيلم 7Dogs، لكن هي بتتجلى بقى في فيلم 7Dogs، لأن لما هتشوفوا الفيلم هتشوفوا قد إيه البرودكشن على مستوى ما حصلش قبل كده في مصر والوطن العربي،وأنا مبسوط إن أنا عامل أغنية الفيلم يا وليدي، وهي كلماتي وألحاني وتوزيع نابلسي، بيغني فيها تلات مطربين إنديا مارتينيز من إسبانيا، ومحمد المجذوب من سوريا، وبن عثمان من مصر، وإن شاء الله تعجبكم، وموجودة في أحداث الفيلم.
وتابع: بقول لكريم عبدالعزيز وأحمد عز شرفتونا في الفيلم ده، عاملين أدوار جامدة جدًا، وأنا شفت الفيلم وشفت المجهود والأكشن اللي معمول، ودمهم خفيف كالعادة، ونجوم كبار، وسعيد إنهم أصدقائي، ومبروك لكل فريق العمل منة شلبي وكل الممثلين العالميين والعرب والمصريين المشاركين، ويا رب بالنجاح.
أغاني الإعلانات أصعب من أغاني الألبومات
وكما حل عزيز الشافعي مؤخرا ضيفًا على آخر خبر TV، وكشف خلال اللقاء عن الفرق بين أغاني الإعلانات وأغاني الألبومات وأيهما أصعب من وجهة نظره.
وقال عزيز الشافعي : كل الأغاني اللي اتقدمت في إعلانات رمضان السنة دي جديدة، واتعملت في شهرين بس، وكل حاجة منهم اتعملت في 10 محاولات، علشان نوصل للأغنية النهائية.
وتابع : لما بعمل أغنية لمطرب بعملها بذوقي أنا والشاعر، بنعمل حالة معينة بتعجبنا وبنعرضها على أكتر من مطرب، لكن الأعلان لازم يتوافق مع وجهة نظر المعلن وشركة الإنتاج والمطرب والمخرج.
اختيار رحمة رياض
وقال عزيز الشافعي أيضا عن كواليس تحضير تتر مسلسل حكاية نرجس : أنا اللي اخترت رحمة رياض لتتر مسلسل حكاية نرجس، وأنا كمان اللي اخترت ليجي سي لمسلسل عين سحرية، قعدت أنا ورحمة رياض قبل برنامج The Voice واشتغلنا مع بعض وعملنا حاجات، وكان في بوادر تعاون بينا.
وأضاف : أنا بحب صوتها وكنت عايز أشتغل معاها، وهي كمان بتحب مصر والأغاني المصرية وبتتكلم مصري زي المصريين، وهي مطربة عراقية كبيرة، لما جت فرصة تتر حكاية نرجس قلت لهم أنا عايز رحمة رياض تغني التتر، وكلمت حمدي بدر علشان يتواصل معاها، سافرنا لبنان وسجلنا الأغنية، وطلعت من أجمل الأغاني، وهي من كلمات نادر عبدالله وتوزيع أحمد عادل.
