عزيز الشافعي : بطلت كتابة أغاني ومحدش زعلان مني من الشعراء
حل عزيز الشافعي ضيفًا على آخر خبرTV، وكشف عن كواليس كتابته لعدد من الأغاني التي يلحنها، وما إذا كانت هناك أزمات بينه وبين بعض الشعراء بسبب تدخله في اختصاصات عملهم.
وقال عزيز الشافعي في تصريح خاص : بطلت كتابة أغاني علشان الشعراء، واعتقد محدش زعلان مني منهم، وتابع : الأغاني اللي كتبتها بتكون من موقف اتأثرت بيه، أو إن صاحب الشغل بيطلب مني أكتب أنا الأغنية وألحنها.
عزيز الشافعي يتحدث عن كواليس التحضير لتيتر حكاية نرجس
وكشف عزيز الشافعي من قبل لـ آخر خبر TV، عن كواليس التحضير لمسلسل حكاية نرجس، وقال : أنا اللي اخترت رحمة رياض لتتر مسلسل حكاية نرجس، وأنا كمان اللي اخترت ليجي سي لمسلسل عين سحرية، قعدت أنا ورحمة رياض قبل برنامج The Voice واشتغلنا مع بعض وعملنا حاجات، وكان في بوادر تعاون بينا.
شاهد بالفيديو ..
وتابع : أنا بحب صوتها وكنت عايز أشتغل معاها، وهي كمان بتحب مصر والأغاني المصرية وبتتكلم مصري زي المصريين، وهي مطربة عراقية كبيرة، لما جت فرصة تتر حكاية نرجس قلت لهم أنا عايز رحمة رياض تغني التتر، وكلمت حمدي بدر علشان يتواصل معاها، سافرنا لبنان وسجلنا الأغنية، وطلعت من أجمل الأغاني، وهي من كلمات نادر عبدالله وتوزيع أحمد عادل.
تيتر مسلسل اتنين غيرنا
وعن تيتر مسلسل اتنين غيرنا قال عزيز الشافعي : فكرة الأغنية بدأت عندما طلبت مني المؤلفة رنا أبو الريش قراءة حلقات المسلسل تمهيدًا لكتابة الأغنية، وبعدها عدى حوالي خمسة أيام ومحدش كلمني، فقلت يمكن يكونوا غيروا الفكرة أو قرروا ينزلوا التتر بموسيقى فقط، ومكنتش حاسس إن في حاجة بتحصل.
أنغام أعجبت بالأغنية من اللحظة الأولى
وأضاف عزيز : فجأة قالوا يلا نعمل التتر، وده كان تحدي لأن الوقت كان قليل جدًا، أنا كنت فاهم المسلسل كويس وعارف أحداثه وعايزين إيه في الأغنية، لكن ضغط الوقت كان صعب، وقعدت مع نفسي واشتغلت لحد ما طلعت فكرة أغنية مش حبيبي بس، وأنغام أعجبت بالأغنية من اللحظة الأولى، والمؤلفة رنا أبو الريش والمخرج خالد الحلفاوي وفريق العمل، ولم يتم تغيير سوى كلمة أو كلمتين فقط، قبل أن يتولى الموزع طارق مدكور توزيعها وتسجيلها.
