نوران ماجد : بعشق نجلاء فتحي وفتي أحلامي لازم يكون طيب
حلت نوران ماجد ضيفة على آخر خبر TV، بعد نجاحها الكبير في مسلسل أولاد الراعي في رمضان 2026، وكشفت خلال اللقاء عن جوانب مختلفة من شخصيتها، واختياراتها في الحياة، ومواصفات فتى أحلامها إلى جانب رغبتها في تقديم دور شريهان في فيلم كريستال.
نوران ماجد : مريت بفترة اكتئاب وخسيت 10 كيلو
وكشفت نوران عن مرورها بفترة صعبة عانت خلالها من الاكتئاب وزيادة الوزن، قائلة : أكتر مره خسيت فيها كان 10 كيلو، كنت وصلت لرقم كبير قوي وكنت في مرحلة اكتئاب، فكنت باكل كتير قوي، وأنا من النوع أصلاً مابتخنش، فأكلت كتير قوي فتخنت وخسيت بعدها 10 كيلو، وده كان تحدي بالنسبة لي في الفترة دي.
وتحدثت عن مواقف الإعجاب وتعرضها للمعاكسات، وقالت : مابفتكرش المعاكسات، يعني مفيش حاجة مختلفة قوي، وممكن حد يقولي إيه الحلاوة دي؟ أو يا قمر، وإيه الشقاوة دي؟.
كما تحدثت عن حبها الكبير لـ ميرفت أمين ونجلاء فتحي، وقالت : ميرفت أمين بموت فيها طبعاً، بس نجلاء فتحي بالنسبة لي من وأنا صغيرة بموت فيها، دي حاجة كبيرة قوي عندي.
نوران ماجد : نضافة الراجل بتلفتني أكثر من الشخصية
وتحدثت عن أكثر ما يلفت نظرها في الرجل، وأوضحت : نظافته، ريحته، شكله، جزمته نظيفة، البرفيوم بتاعه يبقى حلو كده، وأسنانه نظيفة، وبعدين ندخل بقى على الشخصية، الشكل مش الأهم، النظافة، ممكن الشكل يبقى عادي جداً بس نظيف بيلمع كده، مستحمي.
كما تحدثت عن اختياراتها في الأزياء، وقالت : ممكن أجيب من LV الشنط والجزم وحاجات معينة، وأجيب من زارا الأساسيات، بينزلوا حاجات حلوة قوي، كما أعربت عن رغبتها في إعادة تقديم فيلم كريستال وتقديم دور شريهان.
وأوضحت أنها تميل حاليًا إلى ارتداء الكعب العالي أكثر من الأحذية المسطحة والبالرينا، لما يمنحها من إحساس بالأنوثة.
مواصفات فتي أحلام نوران ماجد
وتحدثت عن مواصفات فتى أحلامها، وقالت : طيب، دي أول حاجة طيب ثم طيب ثم طيب، وبعدين شخصيته قوية، راجل يعتمد عليه، مش كذاب، بيحب اللي حواليه، حنين، ويبقى وحش مع الدنيا كلها بس معاكي إنتِ يبقى حنين عليكي، دي أهم حاجة، يكون بياخد باله مني.
كما أكدت أنها ترفض الارتباط بشخص من داخل الوسط الفني، موضحة أن الأمر يكون صعبًا بسبب طبيعة العمل وعدم القدرة على التلاقي بشكل مستمر.
