تعرف على أسرار وكواليس حياة رشدي أباظة الفنية والشخصية
عرضت على مدار شهر أبريل، الحلقة الأولى من برنامج أبيض وأسود، تقديم الناقد الفني محمد شوقي، على منصات آخر خبر TV، وكانت ضيفتها منيرة أباظة، الشقيقة الصغرى للفنان الراحل رشدي أباظة، وكشفت عن كواليس وأسرار لأول مرة في حياة الدنجوان.
الأسئلة الممنوعة في حياة الدنجوان
وقالت منيرة أباظة : في إشاعات كتيرة ممكن نتكلم عنها، وإشاعات صعب نتكلم عنها، وتابعت : من أسخف الإشاعات في حياة رشدي أباظة أن كل قبر يدخل فيه يطلع منه، وده عيب جداً، يمكن يكون هو أقرب من أي حد لربنا، وهو غير المدفع بتاعه أصلاً مرة واحدة، لأنه كان مشتري مدفع قبل ما يتوفى في سقارة.
وتابعت : رشدي كان معاه أرض في طريق إسكندرية الصحراوي، ووالدته قررت تبني مسجد فيها، وعملت فيها كمان مسجد، وأخدت موافقات كتيرة علشان تعمل الحاجات دي، وهو موجود فيه دلوقتي.
والدته دخلت البيتزا مصر
وتحدثت منيرة أباظة عن مشاريع شقيقها، وقالت : المشاريع والمطاعم اللي كان بيقف فيها رشدي أباظة، كانت بتاعة مامته الإيطالية، وهي أول واحدة عملت البيتزا في مصر، وكان لها مطاعم كتير في وسط البلد.
سر انفصال الدنجوان وسامية جمال
وكشفت شقيقة رشدي أباظة سر انفصال الدنجوان وسامية جمال، وقالت : لما رشدي أباظة طلق سامية جمال مقالش إيه سبب الطلاق، حتى لما بابا كان يسأله فيه إيه؟، يقوله خلاص، وتابعت : ولما رشدي اتجوز صباح في لبنان، وقتها سامية جمال مراته عرفت من الصحافة وجات على بيتنا وكانت زعلانة جداً، وكانت فاكرة إننا عارفين، لكن بعد طلاق رشدي وصباح وقتها سامية عرفت إنها كانت نزوة.
سامية جمال اللي ربت قسمت
كما تحدثت منيرة أباظة عن الدور الذي لعبته سامية جمال في حياة قسمت ابنة الفنان رشدي أباظة، حيث تولت مسؤولية تربيتها ورعايتها بشكل كامل، بعد انفصال والدها عن والدتها الإيطالية باربرا، فكانت هي من ترافقها إلى المدرسة وتعتني بكافة شؤونها اليومية، مما يعكس نبل أخلاقها وعطاءها الإنساني.
دور تمنى تقديمه
وكشفت منيرة أباظة عن الدور الذي تمنى رشدي تقديمه، وقالت : رشدي قدم تقريباً كل الأدوار في أعماله، لكن الدور الوحيد اللي كان نفسه يعمله، هو دور الراهب، واتصور بالفعل بزي الراهب، لكن لظروف معينة مقدمش الدور ده، وده كان حاجة جديدة خالص بالنسبة له.
إسماعيل ياسين نجم شهر مايو في أبيض وأسود
ويتناول برنامج أبيض وأسود على مدار شهر مايو، أسرار لأول مرة في حياة إسماعيل ياسين، في حلقة خاصة تتحدث خلالها ….. عن حياة أبو ضحكة جنان الفنية والشخصية.
