وائل عبدالعزيز : ياسمين عبدالعزيز كانت تتعرض لـ حملات منظمة
حلّ وائل عبدالعزيز ضيفًا على آخر خبر TV، حيث تناول الجدل المثار حول شقيقته ياسمين عبدالعزيز، وما تتعرض له من هجوم في الفترة الأخيرة، متطرقًا إلى ما إذا كانت هذه الانتقادات آراءً من الجمهور أم حملات منظمة، ومن يقف وراء ذلك.
مين وراء الحملات
وقال وائل عبدالعزيز: مين ممكن يكون ورا ده أنا معرفش، وماقدرش أجزم لأن الحاجات دي كلها Under table يعني زي ما بيقولوا كده، زي Black work أو Dirty work، فأنا معرفش مين اللي وراه، بس طبعاً آه كان في حملات كتيرة ومنظمة، مش ممكن يكون كم الهجوم ده، أصل ياسمين جماهيريتها ما شاء الله عليها بالبلايين يعني مش ملايين، وجمهورها بيحبها جدا وبيدافع عنها.
وتابع : أنا قلت قبل كده بيدافع عنها باستماتة، لأنها هي بنت كل الناس، يعني بنت اتربت في بيوت الناس شافوها بتكبر على إيديهم، فطبيعي جداً يبقوا بيحبوها بالشكل ده، يعني ربنا يهديهم والله، ربنا يهديهم على دماغهم.
مسلسل وننسى اللي كان بيدور عن الحملات
وأضاف : وطبعاً كنا شايفين إن ده حملات منظمة وإحنا اتكلمنا ده، عارف المسلسل أصلاً كله عندنا كان بيدور على ده، إنه الحملات وإزاي بتتعمل وإزاي بتتنظملها ومين اللي بيديرها وليه بيديروها، أمر صعب جداً، وأنا الخمس سنين دول لما رجعت أشتغل لقيت الدنيا متغيرة، الجو العام كمان، الطاقة، الخير والحب اللي كان وسط الناس ، مش موجود زي زمان.
وتابع : إحنا كنا بننزل بنبقى حابين أوي رايحين نشتغل وبنشتغل بحب ورايحين نتبسط، أصلاً دي شغلانة إنت رايح تتبسط فيها، فبتطلع أحلى ما عندك ورايح مبسوط ودماغك رايقة، أنا مابتكلمش على مسلسل ده عموماً، أنا ليا أصحابي كانوا شغالين السيزون ده فكنا بنروح لبعض، المود العام نفسه كله كده تحس إنه مش زي زمان، اللي اتغير كتير جداً جداً، فبقيت بتشتغل Very professional لدرجة إنك بتروح بتصور وتاخد بعضك وتمشي.
هفضل داعم لـ ياسمين عبدالعزيز
واختتم حديثه : إحنا كنا بنروح نصور ونخلص، ترابيزة تتفرش، كل الناس تقعد، Cast كله يقعد مع الإنتاج والإخراج والممثلين والنجوم، نقعد ناكل على الترابيزة كلنا، الروح دي مبقاش في الكلام ده، مبقاش موجود، إن إحنا كنا بنحط إيدينا على الحملات دي، دي حملة أهي، أهي، إنتوا بتعملوا حملة أهو والناس عارفة وإحنا عارفين وأدينا شايفين، وقعدنا ندعم ليها طول عمرها من وهي صغيرة يعني، من وهي بيبي كانت بتعمل إعلانات، فأنا هفضل داعم ليها طول عمري يعني، مش هيتغير أكيد، يعني مفيش حاجة في الكون هتيجي تغير ده.
