كحك العيد على طريقة الشيف جيهان رشاد في رمضان بالهنا
تستعد أغلب البيوت لاستقبال عيد الفطر المبارك، ومن أهم العادات المصرية منذ عصر الفراعنه خبز الكحك والبسكوت، وتجتمع سيدات العائلة على طاولة واحدة من أجل الاحتفال بطقوس الخبيز الشهيرة، ولكل بيت طريقة تحضير خاصة بكحك العيد وحشوات مختلفة، لتبقى كل سيدة منفردة بأسرارها الخاصة فى مكونات كحك العيد.
فإذا كنتى حريصة علي إضفاء بهجة وفرحة مختلفة فى بيتك بصحبة أولادك واحفادك، يمكنك التعرف علي طريقة بسيطة لتحضير كحك العيد، بعيداً عن غلاء محلات الحلويات وترندات الكحك التي اجتاحت السوشيال ميديا مؤخراً.
شاهد بالفيديو ..
فرحة كحك العيد فى البيت
وتحدثت الشيف جيهان رشاد فى حوار خاص لبرنامج رمضان بالهنا علي آخر خبر TV، عن طريقتها الخاصة فى إعداد كحك العيد، وقالت : أنا جيل اتربى على عمايل الكحك فى البيت، كنا بنعرف نفرح بعاداتنا وتقاليدنا الجميلة، ومكانش فيه بيت بيشتري من برا الكحك، افتكر أن ستات العيلة أو الجيران كانوا بيتجمعوا فى بيت واحد ويحضر الكحك بكميات كبيرة ممكن توصل لـ 20 كيلو، كلهم معمولين بحب وبركة.
النهاردة هرجع معاكم لذكريات تحضير الكحك البيتى، واللي لسه محتفظة بتحضيرة بنفسي كل سنة، هتعرفوا معايا إزاي تعملى كحك العيد السادة بطريقة بسيطة وسهلة.
مكونات كحك العيد
كيلو دقيق - ٣ معالق سمسم - ملح - خميرة -سمنة - ريحة كحك - ماية فاترة - سكر بودرة.
طريقة تحضير كحك العيد السادة:
-أول حاجة هنحضر كيلو دقيق منخول كويس، ولازم نتأكد أن النوع اللي عندك مناسب للخبز.
-هنحضر الخميرة ودي هنضيف خميرة وعليها معلقتين كبار سكر بودرة وماية فاترة حوالي نص كوباية ونسيبهم لحد ما يبدأوا يتفاعلوا.
-هرجع للدقيق وأضيف عليه باقى المكونات الجافة، ذرة ملح، ريحة كحك، 3 معالق سمسم ني، لأنه لسه هيدخل الفرن ويتحمص.
-وبعدين هنسيح السمنه حوالي 3 أكواب من السمن ولما تسيح أنزلها علي المكونات الجافة بسرعة.
-هنقلب بملعقة خشب، وفى الخطوة دي أوعى تنزلي ايدك لأن الحرارة عالية أوى، لازم حاجة خشب ونقلب براحه لحد ما كل المكونات تندمج مع السمن.
-أول ما العجينة تهدي شوية، هنبدأ فى خطوة فرك العجينة دي بتكون بالايد عشان نتأكد أن كل العجينة تجانست مع الكحك.
-هنسيبها ترتاح شوية صغيرين، ونعرف بقى إن العجينة مظبوطة إننا ناخد جزء منها ونشكله لو فى تشققات يبقى محتاجة لسه نعجنها تاني.
-هنشكل الكحك ونحطه فى صينية علي أعلى درجة حرارة فى الفرن، حوالي ربع ساعة.طريقة تقديم كحك العيد.
طريقة التقديم
تابعت : طبعا كحك العيد بيتقدم فى طبق كبير ونرش عليه سكر بودرة وقت التقديم، وياسلام لما بنشرب جنبة الشاى أول يوم عيد، وبالهنا والشفا.
