سر ارتباط القفطان بشهر رمضان .. الاستايلست لميس خليل تُجيب
ارتبط شهر رمضان بموضة القفطان، التى ظهرت مؤخراً علي ساحة الموضة، ورغم انتشار القفطان بشكل كبير في المغرب، وتميزه فى تصميماته المختلفة، إلا أن كل عام وبالتزامن مع شهر رمضان الكريم، يخصص العديد من مصممى الأزياء كولكشن خاص برمضان، ويبدع كل منهم فى تصميمات مميزة مرتبطة بالحشمة ومناسبة لخروجات الفطار أو السحور فى الشهر الكريم.
القفطان وارتباطه بشهر رمضان
وكشفت الاستايلست لميس خليل، عن سبب انتشار القفطان فى شهر رمضان، وقالت فى تصريحات خاصة لـ آخر خبر TV : رمضان بقى فعلا موسم للفاشون، زمان الزي الرسمى للمصريين كان الجلابية، وبما إننا فى رمضان بنحب نكون محتشمين شوية علشان الشهر الكريم، فبدأنا نلجأ للقفطان.
شاهد الفيديو ..
ابتكار المصريين فى القفطان
وتابعت : علشان كدا علي مدار السنين اللي فاتت بدأ مصممين الأزياء يبتكروا ويطوروا فى شكل القفطان، ومبقاش مجرد شكل يتلبس وخلاص يدل على الاحتشام علشان واسع وطويل، ودلوقتي بقى فى خامات مختلفة زى الكتان والسوارية واللي بيلمع وفيه فصوص، وبقينا نشوف تصميمات تحسيها من كتر المجهود اللي فيها بتتكلم فعلاً.
القفطان أصلة مغربي
وأضافت : عايزة أقول بمناسبة القفطان وارتباطه بشهر رمضان، أنا شخصياً ليا صحاب عايشين برا مصر، بقوا ييجوا مخصوص قبل رمضان علشان ياخدوا القفطانات المميزة اللي عندنا ويروحوا بلادهم يلبسوها، ورغم أن القفطان مش أصله مصرى طبعاً، والمغاربة أكتر شعب مشهورين بيه، بس أنا شايفة إن المصريين بيتفوقوا على نفسهم فى تصميمات وتقاليع القفطان فى شهر رمضان كل سنة عن التانية.
موضة ألوان وخامات قفطان رمضان
وأكملت : بالنسبة لموضة القفطان اللي بنشوفها، خلينى أقول إن مصممين الأزياء مش بياخدوها كدا وخلاص، لأ دا فى أقمشة وألوان وقصات بيرتبطوا بيها مع كل سنة، بالتزامن مع موضة الصيف أو الشتاء، يعني مثلا هتلاقى الفرو وألوان زي البنى منتشرة فى قفطان رمضان 2026، علشان هما موضة الشتا السنة دي أصلاً.
