إيه موضة الفساتين السواريه 2026؟ .. بسنت بدران مصممة الأزياء تجيب
تحدثت بسنت بدران، مصممة الأزياء، عن موضة فساتين السوارية فى 2026، وأكدت أنها أن ستحمل طابع مختلف عن السنوات الماضية.
وقالت بسنت بدران فى تصريح خاص لـ آخر خبر TV : هنشوف التطريز راجع بقوة فى موضة سوارية 2026، ودا بعد ما كان فى اتجاه السنين اللي فاتت ناحية البساطة، يعني السنة دي هنشوف تصميمات بشكل مختلف، ومعاها تطريز بألوان هادية بعيدة عن الألوان الملفتة زي ما شوفنا السنين اللي فاتت.
قماش فساتين سوارية 2026
وتابعت : بالنسبة للقماش، هنشوف القماش المطرز بألوان هادية، بس خليني أوضح أن أنواع القماش مش محدده قوى، زي ما هنشوف شكل قصات الفساتين مختلف قوى، ودا المميز فى فساتين سوارية 2026، يعني كل مصمم أزياء هيعتمد علي قدرته باللعب بالقماش فى تصميماته.
حلم أسبوع الموضة فى باريس
وبسؤال بسنت بدران مصممة الأزياء عن تفاصيل مشاركتها فى أسبوع الموضة بباريس قالت : من أول ما قررت إنى هعرض فى أسبوع الموضة فى باريس، وأنا كنت عايزة ابنى استمرارية إنى بشارك بتصميماتى واسمع كذا سنة فى حدث كبير زي أسبوع الموضة فى باريس، وفى السنة التالتة أطلب منى إنى ممكن أعرض الكولكشن بتاعى على الـ runway، ودا طبعا كان حلم عندى إنى أعرض شغلى فى فاشون شو فى أسبوع الموضة فى باريس.
شاهد بالفيديو ..
كولكشن بسنت بدران فى أسبوع الموضة
أضافت : الحقيقية إنى كنت جاهزة للخطوة دى وقدرت مع الغريق بتاعى نحضر كولكشن مكون من ٢٠ فستان فى حوالي ٧ شهور. كان فى عناصر كتير عايزة احققها فى الكولكشن دا واوصلها لكل الحاضرين من الحركة بتاعت الفساتين أثناء العرض. وأنا أكتر قماشة بشتغل فيها هى الأورجانزا بس المرة دي كنت عايزة أجرب والعب بالقماشة دي بس فى نفس الوقت احافظ على هويتي كمصممة أزياء.
تفاصيل أول فاشون شو فى أسبوع الموضة بباريس
تابعت: كان فى تجارب كتير بالقماش الأورجانزا سواء القيل والخريف أو السادة والمطرز، وقدرت أركز على كل تفاصيل حركة الفساتين أثناء الشو، كمان صممنا تطريزات مخصصة لبعض للفساتين. وكنت سعيدة جدا إنى قدرت أطلع كل حاجة زي ما كنت عايزة وفى الخطة، سواء التصميمات أو الحركة أو تفاصيل الفساتين كل دا قدرت من خلاله القماش على الـ run way أوصل فكرتى من غير ما احكى أى حاجة.
