أسما شريف منير : رفضت أعمل تكميم وعمليات التجميل حرية شخصية
كشفت أسما شريف منير في تصريحات خاصة لها مع آخر خبر موقفها من الخضوع لعمليات تجميل، وذلك على هامش مشاركتها في الدورة التاسعة من مهرجان الجونة السينمائي، والعديد من الأمور الشخصية الأخرى.
وقالت أسما شريف منير : اتعرض عليا قبل كده أعمل عملية تكميم كنوع من الدعاية لكني خوفت، وكمان اتعرض عليا حقن تانية لكن أنا بخاف على صحتي، وبحس إني على قد ماقدر لازم ماحتاجش لحد، وخايفة من اللي بعد الحاجات دي.
وتابعت : ممكن أعمل فيلر، لكن بقالي فترة مش بعملها، وكان نفسي زمان أعمل عملية في مناخيري، بس تراجعت ومليش دعوة بحد لأن العمليات دي حرية شخصية.
التعليقات على إطلالتي بالحجاب كانت إيجابية
وتحدثت أسما شريف منير من قبل عن الانتقادات التي تلقتها بشأن إطلالتها بالحجاب، وقالت : 99% من التعليقات كانت إيجابية، وأضافت : الحمد لله والشكر لله، طبعا 99% من التعليقات كانت إيجابية، بس عشان البني آدمين بني آدمين، فدايماً بيستوقفك الناس اللي بتيجي تخبط فيكي، فبيقول لك بقى : هو ده حجاب؟ طب يا راجل! يا ست! يعني اللي بيحاول مع نفسه وبيجاهد في مكان صعب جداً الجهاد فيه، مش نشجعه؟ مش ندعيلو بالهداية؟ ولا نقول إن ده مش حجاب؟ إنت كده شايف نفسك تفوقت عليا؟ إنت شايف نفسك إن إنت كده بقيت أحسن عند ربنا؟ إنت شايف إنك لما تعدل وتنَظَّر، إنت كده بقيت في مكان أحسن مني؟ كله عند ربنا في الآخر.
أسماء شريف منير : بحاول أقرب من أحسن صورة للحجاب
وتابعت : طبعا دي محاولات، وأنا فاهمة جداً إن موضوع إن الرقبة تبان والحجاب الشرعي المفروض يكون عامل إزاي، بس أنا بحاول جهداً خطوة بخطوة إني أقرب من أحسن صورة لده، والله السنة اللي فاتت واللي قبلها كان شيء، والسنة دي شيء، كل شوية إن شاء الله الواحد يحاول يطور.
واختتمت حديثها برسالة إلى منتقديها، قائلة : فبحاول أقول لهم : خليكوا ناس متحضرة وناس بتمشي بالدين صح؛ إنك تساعد، ما تبقاش ناقم.
مهرجان الجونة
وتقام فعاليات الدورة التاسعة من مهرجان الجونة السينمائي خلال الفترة من 15 إلى 23 أكتوبر الجاري، تحت شعار سينما من أجل الإنسانية، بمشاركة مجموعة من صناع السينما ونجوم الفن من مصر ومختلف دول العالم، وتشمل الفعاليات عروضًا سينمائية وندوات حوارية ولقاءات تناقش قضايا الصناعة وتجارب الفنانين.
ويشارك في الدورة التاسعة أكثر من 80 فيلمًا من مختلف أنحاء العالم، إلى جانب ندوات ولقاءات تجمع نجوم الفن وصنّاع السينما لمناقشة تجاربهم وقضايا الصناعة.
