محمد فراج بعد لعبة جهنم : هبطّل سايكودراما والمرة الجاية رومانسي أو كوميدي
حرص محمد فراج على توجيه رسالة إلى جمهوره بعد انتهاء مسلسل لعبة جهنم، أعرب خلالها عن سعادته بردود الفعل التي تلقاها، ووجه الشكر إلى فريق العمل وصناع المسلسل، كما كشف عن رغبته في الابتعاد قليلًا عن أدوار السايكودراما خلال الفترة المقبلة.
وكتب محمد فراج عبر حسابه على مواقع التواصل الاجتماعي : مش عارف أبدأ منين غير بشكر كبير جدًا على كل الحب وردود الفعل اللي وصلتني من وقت ما لعبة جهنم اتعرض، وممتن جدًا إني كنت جزء من رحلة حبيتها وآمنت بيها من أول يوم.
محمد فراج : اشتغلت على الشخصية دي من قلبي
وتابع : اشتغلت على الشخصية دي من قلبي، وأجمل حاجة لأي ممثل إن تعبه يوصل للناس بالشكل ده، وشكرًا لكل رسالة وكومنت ولكل حد اتفرج وعاش معانا الحكاية، الحب وصلني وفرق معايا جدًا.
محمد فراج يوجه رسالة لصناع لعبة جهنم
وأضاف : شكر كبير لكل زمايلي ولكل فرد في الكرو قدام الكاميرا ووراها، كنت محظوظ إني وسطكم.
واستكمل : شكر خاص للأستاذة دنيا عبدالمعبود على فكرة تحويل القصة الكاملة من حكايات جرائم حقيقية على يوتيوب لعمل درامي، والفضل ليها في لوك الشخصية إنه يظهر بالشكل اللي شوفتوه ده، ولأستاذ سامح سند صاحب القصة الكاملة وصاحب فكرة تقديم وتوثيق الحكايات دي، ولأستاذ مجدي الهواري منتج المشروع اللي تحمس للفكرة وتبناها لحد ما بقت حقيقة.
وواصل : بشكر من كل قلبي الأستاذ عمرو عبدالله على شغل الـSFX هو والفريق بتاعه اللي بشطارتهم ومجهودهم عملوا فرق كبير في شكل الشخصية ومكياجها عشان تطلع بالشكل اللي شوفتوه، وده بالنسبالي كان جزء أساسي من الشخصية ومعايشتي ليها، وشكر كبير لأستاذ إسلام خيري المخرج، والأستاذة نجلاء الحديني المؤلفة، وأستاذ أحمد جبر مدير التصوير اللي قدروا يحولوا الفكرة لعمل درامي يوصلكم بالشكل ده، وطبعًا شكر كبير لـMBC شاهد البيت اللي احتضن المسلسل ووصله للجمهور في كل أنحاء الوطن العربي.
محمد فراج : المرة الجاية يا رومانسي يا كوميدي
واختتم : فخور جدًا بالمسلسل وبكل حد كان جزء منه، وممتن لكل الحب اللي أخدناه منكم
الحمد لله، وبالمناسبة أنا شايف كفاية سايكودراما لحد كده، المرة الجاية يا رومانسي يا كوميدي، ولا إنتوا مبسوطين بعذابي ده؟.
