عمرو محمود ياسين : أنا مش ديكتاتور في شغلي
يواصل السيناريست عمرو محمود ياسين حديثه مع آخر خبر TV، وكشف عن أكثر شئ يغضبه كان يقال عنه في الماضي، ورده على هذه الإشاعات، وحقيقة ما يقال عنه بأنه ديكتاتور في عمله.
حد بيكتب لي؟
وقال عمرو محمود ياسين : أكتر حاجة كانت بتتقال زمان إن عمرو محمود ياسين في حد بيكتبله، مش عارف يعني إيه؟، هل أنا مثلاً لم أتلق تعليمي، أو أنا من أسرة بتشتغل في الحديد والصلب، وتابع : أنا راجل متعلم كويس ومن أسرة فنية، إيه الصعوبة إن يكون عندي هذه الموهبة.
وأضاف : في ناس متصورين إني ديكتاتور في شغلي، وده مش صحيح، أنا عندي قناعة إني مش فاهم كل حاجة، بالعكس لما حد يقولي على أي فكرة في شغلي باخدها، بس لو أنا كتبتها في سكريبت ليا تبقى بتاعتي، ولما مش بقتنع بحاجة مش بكتبها، لأن الأفكار دي باخدها من الحياة.
رسالة دعم لزوجته
وكان قد تحدث عمرو محمود ياسين، من قبل عن مرض زوجته، وقال في تصريح خاص : الموضوع ده أصعب حاجة مريت بيها في حياتي، وبالنسبة لي إنها تمر باللي بتمر بيه ده أصعب اختبار، وعندي ثقة كبيرة في ربنا إن الفترة دي تعدي على خير، لأنها توأم روحي، وأنا بقولها إن شاء الله تبقى زي الفل.
وتابع : إحنا كنا خلصنا علاج، وابتدينا نشوف إيه الموقف، ولقينا لسه في حاجة فاضلة، وأضاف : أنا لقيت إني بعد كل عمل كبير بحصلي حاجة غريبة جداً، من زمان في مسلسل ونحب تاني ليه حد ضرب عليا نار علشان يسرق عربيتي، وفي مسلسل اللي ملوش كبير والدي اتوفي، وفي نصيبي وقسمتك عملت حادثة، ومرة ابني محمود في نصيبي وقسمتك تعب ومكناش عارفين سبب مرضه.
تفاصيل مسلسل وننسى اللي كان
ودارت أحداث مسلسل وننسى اللي كان، حول جليلة رسلان الممثلة - ياسمين عبدالعزيز- التي تجد نفسها محاصرة في شباك تهديد غامض يحول حياتها لساحة مطاردة؛ وهنا يتقاطع طريقها مع بدر - كريم فهمي -، الحارس الشخصي لها، ومع تصاعد وتيرة الخطر، تذوب الحدود بين الواجب والمشاعر، ليتحول بدر من درع واق لشريك في معركة عشق لا تخضع لقواعد الفنون القتالية، حيث يصبح الحفاظ على الحب أصعب من الحفاظ على الحياة.
أبطال مسلسل وننسى اللي كان
مسلسل وننسى اللي كان، من تأليف عمرو محمود ياسين وإخراج محمد الخبيري، وبطولة ياسمين عبدالعزيز، كريم فهمي، شيرين رضا، إيهاب فهمي، منة فضالي، خالد سرحان، محمد لطفي، محمود حافظ، منة عرفة، ليلى عز العرب، محمود عزب، عمر شرقي، أسما سليمان وآخرين، و الذي عرض عبر قناة MBC مصر في موسم رمضان 2026، ليكون بذلك أول ظهور لـ ياسمين عبدالعزيز بعمل من بطولتها على شاشة القناة في موسم رمضان.
