الجزء الأول من سابع حلقات Mini Talks .. لقاء الخميسي تخرج عن صمتها
تحدثت لقاء الخميسي خلال لقائها مع برنامج Mini Talks، الذي تقدمه الإعلامية هند رضا، والمذاع عبر منصات آخر خبر TV، عن الطاقة الإيجابية في حياتها، والتضحية من أجل الزوج والأولاد، ورغبتها في عودتها للغناء ورأيها في شيرين عبدالوهاب وأحمد سعد.
بعمل اللي في دماغي
وقالت لقاء الخميسي : أنا طول عمري بعمل اللي في دماغي، مش اللي في دماغ الناس، ومن وأنا صغيرة عنيدة، واللي أنا شايفاه صح هو ده الصح بالنسبة لي، حتى لو قعدتي تقنعيني كتير جدًا، إلا لو عرفتي توصلي إنك تقنعيني، بس أنا فعلاً بحس إن أنا بكون مصدقة نفسي.
بحب الغنا
وقالت لقاء الخميسي : أنا لحد دلوقتي بحب الغُنا، لحد اللحظة اللي أنا فيها دي، يعني الغناء والمزيكا بالنسبة لي حياتي، وكان نفسي أعمل حفلات، وبقالي شوية بقول لنفسي ولأصحابي لأ، أنا بفكر أغني تاني، وخلاص الفكرة رست في دماغي، أنا عايزة أغني، هاتولي أغاني يا جماعة.
بحب روبي وشيرين وأحمد سعد
وأشارت إلى إعجابها بـ روبي، قائلة: بحب روبي أوي، روبي لذيذة جدًا وعندها روح لطيفة، وأنا حاسة إن عندي الروح اللطيفة دي، وأنا بحب الغُنا جدًا، وطول ما أنا ماشية في البيت حاطة الهيدفون وبغني مع الناس، وبحب الأغاني القديمة جدًا، وكمان بحب حاجات جديدة.
وعن الفنانين الذين تستمع إليهم، قالت: بحب أحمد سعد أوي، وبحب منه الأغاني الفرفوشة، هو لذيذ وكاريزماتك وصوته حلو، والأغنية حلوة واللحن حلو، فمينفعش متحبيهوش، كما أعربت عن حبها لعدد من النجمات، قائلة : بحب سميرة سعيد أوي أوي، وبحب أنغام، وبحب شيرين عبد الوهاب.
واختتمت حديثها عن شيرين قائلة : شيرين عندها إحساس مبهر، وعندها جواها شجن وعواطف وحب كتير، وهي لازم تبقى عارفة إن جواها حاجات حلوة أوي.
حب لقاء لـ شادية وأغنيتها المفضلة
وكشفت لقاء عن حبها الكبير لأعمال الفنانة الراحلة شادية، مؤكدة أن أغنيتها المفضلة هي : وحياة عينك وفداها عينيا، أنا بحبك قد عينيا، وقالت : أنا بحب شادية قوي، فظيعة ولذيذة ومبهجة، وأغانيها كلها مبهجة، وما بحبش الكآبة.
وأضافت أنها تعشق الأفلام الكلاسيكية بالأبيض والأسود، موضحة : أنا كده كده بحب الأفلام الأبيض والأسود القديمة، وبحب عبدالحليم حافظ، كما أشادت بفيلم الزوجة 13، مؤكدةً أنه من بين أعمال شادية المفضلة لديها.
الجيل الجديد أذكي
و قالت لقاء إن الساحة الفنية تشهد ظهور جيل جديد يمتلك موهبة وطموحًا كبيرين، مضيفة : في جيل جديد طلع، جيل شاطر بنات وولاد، إحنا كنا بنشتغل مع الجيل الكبير زي أستاذ نور، ومحمود، وممدوح، ومعالي زايد، إحنا أخدنا وقتنا، ودلوقتي في جيل تاني عايز ياخد وقته، فيمنفعش ننافسهم لأن ده حقهم.
وتابعت : الجيل ده أذكى من جيلنا بكتير، وده مش عيب، بالعكس ده كويس جدا، هما عارفين عايزين إيه وبيشتغلوا على نفسهم وبيتطوروا طول الوقت،وأضافت أنها ترى الجيل الجديد حاضرًا بقوة في الساحة الفنية، قائلة : أنا بشوفهم بيلمعوا وبحب ناس كتير منهم، زي سلمى أبو ضيف، وهدى المفتي، وجيهان الشماشرجي دول بنات شاطرين جدًا.
