عمرو محمود ياسين يتحدث عن مسلسلاته مع ياسمين عبدالعزيز وأكثرها نجاحاً
يواصل السيناريست عمرو محمود ياسين حديثه مع آخر خبر TV، وتحدث عن أعماله مع ياسمين عبدالعزيز، وأي من هذه المسلسلات الأقرب إلى قلبه، وترتيب الأعمال من حيث الأكثر نجاحاً من وجهة نظره.
عمرو محمود ياسين يتحدث عن مسلسلات ياسمين عبدالعزيز
وقال عمرو محمود ياسين : السؤال ده صعب جداً، لأن كل عمل منهم ليه مناسبة معينة معايا، مسلسل ونحب تاني ليه كان بداية التعامل مع ياسمين وكنا لسه بنستكشف بعض، اللي ملوش كبير له طعم مختلف عنه، فمش قادر أقول إيه ولا إيه، وبعتبر ملسسل وننسى اللي كان تتويج لسلسلة الأعمال دي، وأنا بحبهم كلهم بصراحة.
وتابع : لو هرتبهم من حيث الأنجح هنبدأ بـ وننسى اللي كان، بعده ييجي وتقابل حبيب، وبعدين اللي ملوش كبير، وأخيراً ونحب تاني ليه، يعني النجاح كان تصاعدي، وده أمر منطقي.
رسالة دعم لزوجته
وكان قد تحدث عمرو محمود ياسين، من قبل عن مرض زوجته، وقال في تصريح خاص : الموضوع ده أصعب حاجة مريت بيها في حياتي، وبالنسبة لي إنها تمر باللي بتمر بيه ده أصعب اختبار، وعندي ثقة كبيرة في ربنا إن الفترة دي تعدي على خير، لأنها توأم روحي، وأنا بقولها إن شاء الله تبقى زي الفل.
وتابع : إحنا كنا خلصنا علاج، وابتدينا نشوف إيه الموقف، ولقينا لسه في حاجة فاضلة، وأضاف : أنا لقيت إني بعد كل عمل كبير بحصلي حاجة غريبة جداً، من زمان في مسلسل ونحب تاني ليه حد ضرب عليا نار علشان يسرق عربيتي، وفي مسلسل اللي ملوش كبير والدي اتوفي، وفي نصيبي وقسمتك عملت حادثة، ومرة ابني محمود في نصيبي وقسمتك تعب ومكناش عارفين سبب مرضه.
تفاصيل مسلسل وننسى اللي كان
ودارت أحداث مسلسل وننسى اللي كان، حول جليلة رسلان الممثلة - ياسمين عبدالعزيز- التي تجد نفسها محاصرة في شباك تهديد غامض يحول حياتها لساحة مطاردة؛ وهنا يتقاطع طريقها مع بدر - كريم فهمي -، الحارس الشخصي لها، ومع تصاعد وتيرة الخطر، تذوب الحدود بين الواجب والمشاعر، ليتحول بدر من درع واق لشريك في معركة عشق لا تخضع لقواعد الفنون القتالية، حيث يصبح الحفاظ على الحب أصعب من الحفاظ على الحياة.
أبطال مسلسل وننسى اللي كان
مسلسل وننسى اللي كان، من تأليف عمرو محمود ياسين وإخراج محمد الخبيري، وبطولة ياسمين عبدالعزيز، كريم فهمي، شيرين رضا، إيهاب فهمي، منة فضالي، خالد سرحان، محمد لطفي، محمود حافظ، منة عرفة، ليلى عز العرب، محمود عزب، عمر شرقي، أسما سليمان وآخرين، و الذي عرض عبر قناة MBC مصر في موسم رمضان 2026، ليكون بذلك أول ظهور لـ ياسمين عبدالعزيز بعمل من بطولتها على شاشة القناة في موسم رمضان.
