عمرو محمود ياسين يحكي قصة مرض زوجته
يواصل السيناريست عمرو محمود ياسين حديثه مع آخر خبر TV، وتحدث عن حياته الخاصة وأسرته، ومرض زوجته الإعلامية آيات أباظة، ورسالة الدعم التي يوجهها لها، والعديد من الأمور التي يكشف عنها لأول مرة.
رسالة دعم لزوجته
وقال عمرو محمود ياسين في تصريح خاص : مش عارف أقول إيه، لأن الموضوع ده أصعب حاجة مريت بيها في حياتي، وبالنسبة لي إنها تمر باللي بتمر بيه ده أصعب اختبار، وعندي ثقة كبيرة في ربنا إن الفترة دي تعدي على خير، لأنها توأم روحي، وأنا بقولها إن شاء الله تبقى زي الفل.
وتابع : إحنا كنا خلصنا علاج، وابتدينا نشوف إيه الموقف، ولقينا لسه في حاجة فاضلة، وأضاف : أنا لقيت إني بعد كل عمل كبير بحصلي حاجة غريبة جداً، من زمان في مسلسل ونحب تاني ليه حد ضرب عليا نار علشان يسرق عربيتي، وفي مسلسل اللي ملوش كبير والدي اتوفي، وفي نصيبي وقسمتك عملت حادثة، ومرة ابني محمود في نصيبي وقسمتك تعب ومكناش عارفين سبب مرضه.
ياسمين عبدالعزيز أختي
وكان قد تحدث عمرو محمود ياسين من قبل عن ياسمين عبدالعزيز، وقال : ياسمين زي أختي فعلاً، وإحنا قريبين جداً من بعض وصديقة مراتي وأخت مراتي، وبنتي عاليا كانت هتدخل كلية معينة وهي أقنعتها تدخل كلية تانية بناءاً على نصيحتها، وبنتي كل شوية تقول أنا لولا ياسمين كنت دخلت كلية كذا.
لم نحدد مشروعنا المقبل
وتابع : فكرة إن ياسمين تطلب مني شغل دي حاجة لا تقلل مني، واللي بيني وبينها مش شغل، إحنا تجاوزنا المرحلة دي وهي صديقة وأخت غالية، وأضافت : أنا قررت في الـ Off season أعمل مسلسل 2 قهوة، وده دور متعملوش ياسمين، وأكيد عندي حاجات مش مناسبة مع ياسمين، لكن أكيد اتمنى أشتغل مع ياسمين، ومحدش يعرف هل هنشتغل الفترة الجاية مع بعض عمل جديد ولا لأ، وقريب جداً هعرف أنا هعمل إيه، وهي هتعمل إيه، وهل هنبقى مع بعض ولا لأ.
تفاصيل مسلسل وننسى اللي كان
ودارت أحداث مسلسل وننسى اللي كان، حول جليلة رسلان الممثلة - ياسمين عبدالعزيز- التي تجد نفسها محاصرة في شباك تهديد غامض يحول حياتها لساحة مطاردة؛ وهنا يتقاطع طريقها مع بدر - كريم فهمي -، الحارس الشخصي لها، ومع تصاعد وتيرة الخطر، تذوب الحدود بين الواجب والمشاعر، ليتحول بدر من درع واق لشريك في معركة عشق لا تخضع لقواعد الفنون القتالية، حيث يصبح الحفاظ على الحب أصعب من الحفاظ على الحياة.
أبطال مسلسل وننسى اللي كان
مسلسل وننسى اللي كان، من تأليف عمرو محمود ياسين وإخراج محمد الخبيري، وبطولة ياسمين عبدالعزيز، كريم فهمي، شيرين رضا، إيهاب فهمي، منة فضالي، خالد سرحان، محمد لطفي، محمود حافظ، منة عرفة، ليلى عز العرب، محمود عزب، عمر شرقي، أسما سليمان وآخرين، و الذي عرض عبر قناة MBC مصر في موسم رمضان2026، ليكون بذلك أول ظهور لـ ياسمين عبدالعزيز بعمل من بطولتها على شاشة القناة في موسم رمضان.
