لحمة وفتة وشيكو ومصطفى غريب .. محمد عبدالرحمن في حوار خاص
كشف محمد عبدالرحمن، خلال حواره مع آخر خبر TV، عن تفاصيل طقوسه في عيد الأضحى، وكيف يقضي أيام العيد بين الأكل والزيارات العائلية، كما تحدث عن مائدة العيد وأقرب الأشخاص الذين يفضل تناول الطعام معهم، وكواليس خاصة من أجواء العيد في حياته.
طقوسه في العيد
وقال محمد عبدالرحمن : يوم العيد الصبح بحب الكبدة بتاعت الدبيحة، بحبها بالبصل وكنت أنا اللي بعملها زمان، بس طبعًا أمي وأختي ومراتي ربنا يديهم الصحة هما اللي دايمًا بيمسكوا القسم ده دلوقتي، وبحب أعملها بالبصل وجنبها شوية رز أبيض.
وتابع : وفي وجبة أمي كانت على طول تعملها لنا زمان قبل صلاة العيد، بالذات في العيد الكبير، كان بيتخبز فيه الرقاق دايمًا قبل العيد، فكنا قبل ما نروح صلاة العيد أمي تحط لنا رقاق باللبن وعليه شوية سكر، وأعتقد الوجبة دي مبقتش موجودة دلوقتي.
الغداء .. فتة
وتابع : الغداء طبعًا بيبقى الفتة، كله بيعمل فتة، أنا كان عندي زمان مشكلة مع العيش اللي في الفتة فكنت أحب آكل الرز بالصلصة كده وشوية شوربة وحتة لحمة وخلاص، بعد كده استسلمت بقيت آكل فتة فتة.
العشاء .. جبنة
وأضاف : والعشا بيبقى جبنة طبعًا، لأن العجل بيكون خلص مننا، مبقاش في لحمة في العشا، يعني فطرت واتغديت لحمة خلاص، وأحياناً مبتعشاش خالص.
توتة بيحب ياكل مع مين ؟
كما تحدث عن أقرب الأشخاص الذين يفضل تناول الطعام معهم، وتابع : بحب آكل مع شيكو طبعًا، ومصطفى غريب، وكريم محمود عبدالعزيز، وأحمد السعدني، كلهم القعدة معاهم حلوة.
وأضاف : بحب أروح أتغدى في البيت عند أحمد السعدني، وده سر بقوله لأول مرة، دايمًا عندهم طبق ثابت جنب أي غداء كفتة رز محمرة، فبستمتع في الأكل معاه.
وتابع مازحًا : خاطر مرعب طباخ وأكيل، أوس أوس مبيتكلمش وهو بياكل خالص، مابينطقش، وأنور بياكل ببطء شديد جدًا في 3 أو 4 ساعات، ومعتز التوني الأكل معاه متعة، وكريم محمود عبدالعزيز بيحب ياكل كتير ومبيبانش على جسمه.
العيد والعيلة
واستكمل : أنا العيد بالنسبة لي بقي بقى خروجة عند أمي، وبصلي العيد وبعدين أروح عندها مع ولادي والمدام، ومبحبش أنام في العيد، بحب أعيش أجواءه، زمان كنت بحب الخروجات جدًا بس دلوقتي بقت الزيارات العائلية هي الأساس، بروح عند أمي وإخواتي وحماتي وأخو مراتي.
العيد زمان
واختتم : زمان كنت بخرج كتير أروح سيتي ستارز، وأروح عند ستي في شبرا في العيد وناكل بيتزا من محل اسمه بيانو، وكلها كانت خروجات أكل، وكنا نروح ملاهي هابي لاند اللي موجودة عالكورنيش، بس بقى لما بتكبر بتكتشف إن الدنيا بقت زحمة أوي.
