المؤلف محمود حمدان يتحدث عن محمد رمضان وأحمد العوضي
واصل المؤلف محمود حمدان حديثه مع آخر خبر TV، وذلك بعد النجاح الذي حققه مسلسله علي كلاي، بطولة أحمد العوضي خلال موسم رمضان الماضي، ليرد على سؤال حول الفارق بين طريقة تفكير أحمد العوضي ومحمد رمضان، وذلك في ظل تعاونه مع كلٍ منهما.
شاهد بالفيديو ..
حديث محمود حمدان عن العوضي
وقال محمود حمدان : الاثنين دماغهم ألماظ، محمد رمضان دماغه جميلة جداً وبعشق طريقة تفكيره، وأحمد العوضي بحب أقعد نتكلم أنا وهو في الدراما وفي الحكايات وفي المسلسلات وأفلام زمان ومسلسلات زمان.
وتابع : أحمد ممكن يتفرج على فيلم قديم بالمناسبة ويكلمني يقول لي : حودة بقولك إيه، ده أنا شفت فيلم كذا ده كان حلو أوي، إزاي أستاذ فريد شوقي كان عامل كذا، أو إزاي أستاذ عادل إمام كان عامل كذا، فإحنا بنقعد نتناقش طول الوقت في الدراما أو في الأفلام، فبحب دماغ الاثنين الحقيقة جداً.
مشروع لم يكتمل بين محمد رمضان ومحمود حمدان
واستكمل : استمتعت بالشغل مع محمد رمضان، رغم إن التحضير مع محمد رمضان مكانش بنفس نسبة التحضير مع أحمد العوضي كتايم، بس أنا ورمضان لما بنتقابل، رمضان بيستقبلني كويس جداً وبيستضيفني كويس جداً.
واختتم : يعني اتقابلنا طبعاً، إحنا آخر مرة اتقابلنا كان في عزا والده محمد، رحمة الله عليه، وقبلها بقى كنا متقابلين عشان كان في بينا عمل، وده الخبر اللي مكانش حد يعرفه، من سنة ونص تقريباً أو سنتين، كان في بيني وبين محمد رمضان عمل، بس يعني أنا انشغلت في حاجات وهو انشغل في حاجات ومكتملش المشروع، ممكن يجيله وقت ويتعمل في يوم من الأيام، أتمنى طبعاً محمد أخويا ومن أهم الممثلين اللي أنا بحبهم يعني.
فيلم الديزل
يُذكر أن محمود حمدان سبق وتعاون مع محمد رمضان في فيلم الديزل، كما جمعه أكثر من عمل مع أحمد العوضي، كان آخرها مسلسل علي كلاي الذي عُرض خلال موسم رمضان الماضي وحقق نجاحًا لافتًا، والمسلسل شارك فيه بجانب العوضي كل من درة، يارا السكري، عصام السقا، محمود البزاوي، انتصار، طارق الدسوقي، عمر رزيق، وآخرين، والعمل من تأليف محمود حمدان، وإخراج محمد عبدالسلام، وإنتاج شركة سينرجي للمنتج تامر مرسي.
