المؤلف خالد دياب : أشغال شقة وبرشامة اتعرضوا على نص الوسط الفني ومحدش وافق يعملهم
أكد المؤلف خالد دياب تقديره الكبير للتعاون مع هشام ماجد، كما أشاد بالتزامه وروحه داخل فريق العمل، وقال : أستاذ هشام ماجد أشكرك إنك اديتني الفرصة إني أشتغل معاك بداية من أشغال شقة لحد برشامة، العملين دول اتعرضوا رسميًا على نص الوسط الفني ولم يرغب نجم أو نجمة إنهم يشتركوا فيهم، ثم جاء هشام ماجد فتغيرت المعادلة تمامًا.
وأضاف : هشام اسمه الحركي في الوسط الفني هو الألماني، مش عشان شكله لا، ده عشان التزامه، التزامه بالمواعيد والجاهزية والاجتهاد بدأ من العمل على النص مرورًا بالتصوير انتهاءً بالمونتاج.
هشام ماجد هيكسر الدنيا في الأدوار الجادة
وتابع : ليه كل اللي بيشتغلوا معاه بينوروا؟ عشان هشام بيتعامل مع الأعمال الفنية بمنطلق كابتن فريق الكورة، يعني المهم الفريق يكسب مش مهم مين يحط الجون، فبيعمل أسيست للكل عشان يجيبوا جوان حلوة، فطبيعي أول ما لاعب يجيب جون يطلع يجري عليه ويحضنه كأنه بيقوله من غيرك عمري ما كنت هاجيب الجون بالحلاوة دي.
واختتم : هشام يعني القلب الأبيض والسند لكل الفريق، هشام مش كوميديان محترف لأ، ده ممثل متكامل ومحترف، وأوعدكم هتشوفوه في أدوار جد جدًا هتكسر الدنيا، وأخيرًا مفيش حد اشتغل معاه إلا بيحبه جدًا وأنا أولهم، وده من غير أي مبالغة.
أحداث فيلم برشامة
وحقق فيلم برشامة نجاحا كبيراً ةتخطت إيراداته الـ 74 مليون جنيه في 5 أيام عرض، والفيلم تدور أحداثه في إطار كوميدي يسلط الضوء على ظاهرة الغش في الامتحانات وكيف يمكن لشيء بسيط مثل برشامة أن تفتح بابًا لسلسلة من الأحداث غير المتوقعة، ويجسد هشام ماجد خلال الأحداث دور طالب ثانوية عامة يجد نفسه في مواجهة معلمة شديدة الذكاء تجسدها ريهام عبدالغفور تسعى لكشف أساليب الغش.
أبطال فيلم برشامة
ويشارك في فيلم برشامة مجموعة من النجوم هم هشام ماجد، مصطفى غريب، ريهام عبد الغفور، حاتم صلاح، باسم سمرة، عارفة عبد الرسول، فاتن سعيد، كمال أبو رية، ميشيل ميلاد، فدوى عابد، ومن إخراج خالد دياب والمؤلفين أحمد الزغبي وشيرين دياب ومن إنتاج شركتيّ سكاي ليميت وفيلم سكوير.
