محمد رجب : أبدأ تصوير فيلم كوكتيل بعد العيد
يواصل محمد رجب حديثه مع آخر خبر TV، وكشف عن أحدث أعماله السينمائية فيلم كوكتيل، وسبب غيابه 10 سنوات عن جمهور السينما، كما تحدث عن تفاصيل الفيلم والرسالة التي يقدمها.
تفاصيل فيلم كوكتيل
وقال محمد رجب : عندي فيلم اسمه كوكتيل، فيلم مهم جداً وتعبت عليه كتير قوي، وبقالي أكتر من سنتين شغال عليه، وبإذن الله يطلع للنور، وهبدأ أشتغله بعد العيد.
وتابع : كوكتيل هو فيلم نفسي، والرسالة بتاعته بتتكلم عن الرضا إنك لما ترضى وتعرف أنت مين وواقف فين، بتعرف تاخد خطوة لقدام، والفيلم ده شبهي فعلاً، ولسه بنختار الكاست، وهو إنتاج الأستاذ أحمد السبكي.
شاهد بالفيديو ..
وعن سبب غيابه عن السينما، قال : زي ما كنت غايب عن الدراما، أنا غبت عنها لمدة 10 سنين، وكنت بخاف منها جداً وبحس إنها صعبة أوي خصوصاً إن الصناعة بتقوم على إنك ممكن تدخل تصوّر بـ 5 حلقات بس، وأنا ماكنتش شايف إني أقدر أمسك الشخصية في 5 حلقات وتجيلي حلقات تانية وأنا بصوّر.
واختتم : فضلت 10 سنين فاكر إن عندي وجهة نظر، وإنه لازم مش هشتغل غير لما الحلقات تبقى مكتوبة كلها، اكتشفت بعد 10 سنين إن أنا اللي خسران، الحلقات مابتتكتبش ولا بتجهز قبلها، وده قانون الشغلانة للأسف.
محمد رجب في رمضان 2026
وينافس محمد رجب هذا العام بمسلسل قطر صغنطوط، والذي بدأ عرضه في النصف الثاني من رمضان الجاري، وتحدث رجب من قبل عن العمل وقال في تصريحات خاصة لـ آخر خبر TV : بقالي أكتر من سنة بحضر لمسلسل قطر صغنطوط، وكل مرة بيتأجل وبيتغير السيناريو، وأنا كنت حابب أقدم دور شر، لأني بقالي كتير مقدمتش دور شر، والحمد لله ردود الأفعال كويسة، وانتظروا الجزء الثاني من المسلسل رمضام المقبل.
تفاصيل مسلسل قطر صغنطوط
ويشهد مسلسل قطر صغنطوط عودة محمد رجب إلى أدوار الشر التي كانت نقطة انطلاقه في السينما، أبرزها مذكرات مراهقة مع هند صبري وأحمد عز، وإزاي البنات تحبك مع هاني سلامة ونور، الباشا تلميذ مع كريم عبدالعزيز وغادة عادل، وملاكي إسكندرية مع أحمد عز وغادة عادل، قبل أن يتصدر البطولات في السينما والدراما ويبتعد عن أدوار الشر.
