محمد رجب يحكي قصته مع طارق العريان وإيناس الدغيدي
كشف محمد رجب خلال حديثه مع آخر خبر TV، عن الصدفة التي جعلته يدخل مجال الفن في الوقت الذي كان يعمل فيه كمساعد مخرج.
محمد رجب : كنت مساعد مخرج مع طارق العريان
وقال محمد رجب : طارق العريان حبيبي، أنا كنت المساعد بتاعه لمدة 4 سنين، اشتغلت معاه مجموعة أغاني لأهم نجوم في مصر، ولما رجع سينما بعد 11 سنة كان آخر فيلم عامله لأحمد زكي الإمبراطور وتغيب عن السينما 11 سنة - لما رجع، رجع بفيلم السلم والتعبان وكنت أنا المساعد بتاعه، مساعد أول.
وتابع : حضرت معاه الكاست واللوكيشن، وكنت وقتها في الفترة دي خلاص فكرت إني أعتزل التمثيل، لأن ساعتها حاولت كتير وفشلت، وكنت بتعلم معاه واحدة واحدة إني هخرج يعني، وفي نهاية فيلم السلم والتعبان قبلها بيوم، جاتلي مكالمة من إيناس الدغيدي على فيلم مذكرات مراهقة.
شاهد بالفيديو ..
واستكمل : كنت ساعتها تقريبًا بحجز وطالع اليونان، فكنت محتاج فلوس للسفر، فقبلت إني أشتغل مساعد مخرج، ساعتها أخدت 7000 جنيه قلت هيفيدوني في اليونان يعني وحضرت معاها الفيلم كله، حضرت السيناريو والممثلين، لحد ما كان هند صبري وأحمد عز بيجوا يعملوا بروفات، تقولي : أقعد معاهم، أقولها :أنا مالي؟ أنا مساعد مخرج.
وواصل : نزلت أول يوم تصوير وأنا مساعد مخرج، فبتقولي : يا رجب، قلتلها: أنا؟، قالتلي : تعالى .. يلا خش أقعد، قلتلها : إيه؟، قالتلي : ما تزهقنيش! وقفشت جداً، فلقيت نفسي أمر واقع.. أنا بسأل على مين اللي هيلعب الدور ده وما جاش.
محمد رجب : إيناس الدغيدي سبب دخولي التمثيل
واختتم : قعدت طول عمري بدوّر أشتغل وأتحايل كتير، فوق الـ 15 سنة، ويوم ما مثلت، مثلت غصب، مثلت فجأة، مثلت بضغط، فالست دي أكنّ لها كل الفضل؛ لأن أنا كنت في مرحلة لا يمكن حد يقدر يقنعني إني ممكن أرجع، وعملت أول مشهد، وكان أجري 7000 جنيه، وصرفتلي بعد المشهد الأول 2000 جنيه، وبقيت محمد رجب.
محمد رجب في رمضان 2026
وينافس محمد رجب هذا العام بمسلسل قطر صغنطوط، والذي بدأ عرضه في النصف الثاني من رمضان الجاري، وتحدث رجب من قبل عن العمل وقال في تصريحات خاصة لـ آخر خبر TV : بقالي أكتر من سنة بحضر لمسلسل قطر صغنطوط، وكل مرة بيتأجل وبيتغير السيناريو، وأنا كنت حابب أقدم دور شر، لأني بقالي كتير مقدمتش دور شر، والحمد لله ردود الأفعال كويسة، وانتظروا الجزء الثاني من المسلسل رمضان المقبل.
