عزيز الشافعي يكشف كواليس أغنية الدنيا بحالها مشاكل
حل عزيز الشافعي ضيفا على آخر خبرTV، وكشف عن كواليس أغنية تتر مسلسل سوا سوا، التي قدمها بهاء سلطان.
الملحن أختلف
وقال: أنا كان عندي مشكلة في سوا سوا إني معايا بهاء سلطان، في تتر بعد نجاح يا صاحبي، اللي عملتها منه عدلي القيعي وأحمد طارق يحيى، فالأدوات كلها كانت هي هي، ما عدا الملحن اختلف، فكان عندي مشكلة إن نجاح يا صاحبي كان نجاح كبير جدًا، وما زال نجاحها لحد دلوقتي، وده كان عاملي ضغط شخصي، وده كان أصعب تتر بالنسبة لي.
شاهد بالفيديو ..
عملنا 6 أغاني
وأضاف : إحنا عملنا 6 أغاني، والكلام ده اللي هو دنيا بحالها مشاكل، بس أنت عسل تتاكل، أنا عملت أول تجربة اللي نزلت دي، وبعدين قالوا نشوف حاجة تانية، فقعدت ألحن الكلام ده بكل الطرق اللي ممكن يتلحن بيها لأني كنت تايه ومش عارف أنهي أحسن، لحنت سلو ومقسوم ودراما وشعبي وفرحان، وقعدت ألعب في الكلام.
وتابع : بعد ما تعبنا في الوقت ده كله، بقالي 3 أسابيع بشتغل بلحن وبغير مزيكا وألحان، قالولي إحنا عجبنا أول واحد، و لغاية ما بتنزل الأغنية أنا مبعرفش اللي هيحصل، أنا بعرف إذا كانت الأغنية حلوة ولا وحشة، لكن تنجح ولا متنجحش دي معرفهاش خالص،
الأغنية نزلت ونجاحها بدأ من أول يوم، ودلوقتي بقت من أهم الأغاني الموجودة، وكمان فيديو أحمد مالك وهدى المفتي كان من أسباب نجاح الأغنية، وحقق انتشار كبير.
أبطال مسلسل سوا سوا
ويشارك في بطولة مسلسل سوا سوا كل من : أحمد مالك، هدى المفتي، نهى عابدين، أحمد عبدالحميد، خالد كمال، وآخرين، وهو من تأليف مهاب طارق وإخراج عصام عبدالحميد، ومن إنتاج شركة صادق الصباح، والعمل تدور أحداثه في منطقة شعبية ويتم تصوير مشاهده بمنطقة روض الفرج، ويجسد خلاله أحمد مالك دور لاعب كرة واسمه إبراهيم أما هدى المفتي تجسد شخصية ممرضة اسمها أحلام.
قصة مسلسل سوا سوا
تدور الأحداث فى اطار اجتماعي رومانسي شعبي، حول صراعاً عاطفياً حول شخصية أحلام، التي تجسدها هدى المفتي، إذ يتنافس على الفوز بقلبها شابان، الأول يرى الحب امتدادا لسطوته ونفوذه، ويختزل المشاعر في السيطرة والتملك، ويجسد دوره حسني شتا، بينما يقدم أحمد مالك شخصية إبراهيم، الرجل الذي يحب أحلام بصدق ويقاتل من أجل حمايتها والحفاظ على قلبها.
