عمر المهندس : أبويا كان بيعمل حفلات عمرو دياب وأنا من أكبر معجبيه
حل المخرج عمر المهندس، حفيد الفنان الراحل فؤاد المهندس، ضيفًا على ثالث حلقات برنامج Mini Talks الذي تقدمه الإعلامية هند رضا عبر منصات آخر خبر TV، وكشف خلال اللقاء عن علاقته الخاصة بأغاني عمرو دياب، مؤكدًا أنه من عشاق الهضبة منذ سنوات طويلة.
عمر المهندس يحكي ذكرياته مع الهضبة
وأوضح عمر المهندس أن علاقته بعمرو دياب بدأت منذ طفولته، حيث كان والده ينظم حفلات في الكريسماس داخل أحد الفنادق الشهيرة في الزمالك، وقال : زمان أبويا كان بيعمل حفلات في الكريسماس في أوتيل مشهور في الزمالك، وأنا اتولدت 24 ديسمبر في حفلة من الحفلات دي.
شاهد بالفيديو ..
وأضاف موضحًا أن ولادته لم تكن داخل الحفل كما قد يبدو من القصة، قائلًا : أنا اتولدت في مستشفى أكيد ما ولدتنيش في نص الحفلة، بس الطلق جه أثناء الحفلة، يعني الوقت كان متزامن مع الحفلة.
عمر المهندس : حبيت عمرو دياب بسبب أبويا
وأشار إلى أن والده كانت تربطه صداقة قوية بعمرو دياب، لذلك كان يراه كثيرًا في طفولته دون أن يدرك في البداية أنه نفس الفنان الذي يسمع أغانيه، وقال : أبويا والهضبة كانوا أصحاب، وأنا صغير كنت بشوفه كتير بس مش عارف مين، وبعدين غالبًا في ألبوم ويلوموني أو يا عمرنا ابتديت أربط إن ده هو اللي بسمع أغانيه، ومن حب أبويا فيه بقيت أنا كمان بحب أغانيه.
وكشف عمر المهندس عن موقف قديم جمعه بعمرو دياب في شرم الشيخ، موضحًا : آخر حفلة أبويا عملها مع الهضبة كانت في شرم الشيخ في العيد، وأنا حكيت له القصة دي مؤخرًا.
وأضاف : كان ده تقريبًا سنة 2001 أو 2002، وبعد الحفلة طلعنا عنده الأوضة، وكان بيسمعنا أغاني ألبوم علم قلبي قبل ما ينزل، وكان موصل جهاز بالتليفزيون وشغل الأغاني.
وتابع : أنا قعدت أسمع والكبار طلعوا البلكونة وأنا فضلت أسمع لوحدي، وأظن دي كانت اللحظة اللي حسيت فيها إن في حاجة نورت جوايا.
واختتم عمر المهندس حديثه مؤكدًا أنه أصبح بعدها من أكبر معجبي عمرو دياب، وقال : من ساعتها بقيت عايز أسمع الألبوم أول لما ينزل، وكبرت شوية وبقيت أنا وأصحابي نقف عند الراجل بتاع الكاسيت نستنى الألبوم نزل ولا لسه، وبعد كده بقيت بحضر حفلاته ومكنتش بفوت حفلة.
عمر المهندس : الهضبة بنفس تأثيره من 2002
وأضاف أن ما يثير إعجابه حتى الآن هو استمرار تأثير عمرو دياب، قائلًا : أنا منبهر إنه لحد دلوقتي بنفس التأثير، القصة دي من 2002، ولسه عنده نفس الـ impact لحد النهارده في مصر وفي العالم، وده حاجة لازم تتدرس.
