الكفتة المشوية على طريقة الشيف ياسمين حامد في رمضان بالهنا
دائماً ما يشغل جدول إفطار رمضان بال السيدات، وتقعن في حيرة كبيرة، طوال الشهر الكريم، ويبقى السؤال المكرر : هنفطر إيه النهارده؟، هو ما يشغل بال الكثيرين، وهو ما يجيب عنه آخر خبر من خلال برنامج رمضان بالهنا، والذي يقدم يومياً وصفة جديدة لمتابعي ومشاهدي آخر خبر TV.
وقامت الشيف ياسمين حامد بتحضير الكفتة المشوية، وقالت : النهارده هقدملكم وصفة من أهم الوصفات في الأيام العادية وفي رمضان وهي الكفتة المشوية، ودي من الحاجات الـ Special جداً اللي أنا بحب أعملها، وهي بجد أكلتي المفضلة، وكل الناس بتحبها جداً، فدايماً بحس إنها صنف سهل يتعمل ويتقدم بأي شكل من الأشكال.
أسرار التحضير
كفتتنا مش بنحط لها توابل كتير خالص، بنعملها في مطبخنا من الألف إلى الياء؛ بنجيب اللحمة والبهارات ونفرمها ونعمل كل حاجة هنا.
المكونات الأساسية : لحمة حمراء، وبنضيف عليها بعض الدهون، وملح وفلفل، وبهارات بسيطة قوي، أنا مش بحب أكثّر التوابل على اللحوم عشان ما تضيعش طعم الكفتة نفسه.
شاهد بالفيديو ..
تشكيل الكفتة : عشان نصبع الكفتة لازم يكون عندنا مية بصل، وممكن نضيف لها شوية ملح وفلفل، بناخد قطعة الكفتة وبنبدأ نديها شكل الصباع والحجم اللي إحنا عايزينه، لكن أرشح دايماً إن الصباع ما يكونش رفيع قوي عشان لما يتحط على الفحم ويستوي يفضل Tender من جوه وما ينشفش.
3 خطوات لضمان تماسك الكفتة على السيخ
في ناس كتير بتشتكي إن الكفتة بتفك منها، لكن بالخطوات دي هتطلع متماسكة جداً:
نوع اللحمة : عند الشراء، نختار قطعة لحمة من الكتف، لأن الكتف ما فيهوش دهون أو حاجات تخلي اللحمة Loose، ودي أكتر حتة ناشفة بتخلي اللحمة ما تفكش بعد الفرم.
الدهون الطبيعية : لازم نستخدم دهون طبيعية من الدبيحة نفسها، الدهون دي بتخلي الكفتة Solid وما تقعش من على السيخ، مهما كانت طريقة التسوية، والنسبة التقريبية بتكون كيلو لحمة عليه ربع كيلو دهون.
التبريد : من أهم التريكات إننا نتبل الكفتة قبلها بيوم وتتحط في الثلاجة علشان تمسك كويس جداً على السيخ.
طريقة الشوي
نطمن إن الفحم سخن جداً وكميته كبيرة علشان الكفتة تتشمع بسرعة وتمسك في السيخ.
السر في التسوية : لازم نفضل نقلب الكفتة طول ما إحنا واقفين علشان تتشمع من جميع النواحي وتستوي سوا واحد، بجد تحفة ولازم تجربوها.
