حماده هلال عن دخول ابنه التمثيل : أتمنى أشوفه مخرج
كشف حماده هلال كواليس مشاركة ابنه يوسف في الموسم الأخير من مسلسل المداح، موضحاً وجهة نظره الشخصية في دخوله الوسط الفني، وذلك خلال حواره مع آخبر خبر TV.
كواليس مشاركة نجل حماده هلال في المداح
وقال حماده هلال : والله ما طلبته، واللي حصل إن فكرة المسلسل المرة دي إنه بيحيي ملك الموتى، بس هم مش موتى، هو مأحياش حد، هو بيسحرك بطريقته.
وتابع : صابر اترمى في البحر اللي غرق فيه داود - شخصية يوسف، فصناع العمل قالوا ما تيجي نعمل حاجة ويبقى داود هو اللي أنقذه، وخرجه وإداله رسالة إنه ما يقدرش يساعد أمه اللي بتظهر لها، فالفكرة كانت راكبة.
شاهد بالفيديو ..
موقفه من تمثيل ابنه يوسف
وحول مشاركة ابنه يوسف في المسلسل، استكمل : يوسف جه المشهد ده بس وخلاص لكن هو مش موجود في باقي المسلسل، وأنا رافض إنه يمثل وهو في السن ده، لأن أنا بعتبره في سن ظلم، وهيظلم نفسه.
وعن سبب هذا الرفض، أوضح هلال من واقع خبرته : أي واحد في السن ده بيظلم نفسه لأن الشخصية لسه ماتكونتش، لا هو شاب ولا هو طفل، والشخصية اللي بين البينين دي بتتظلم، وبتبقى مذبذبة في أي حاجة.
وتابع : أنا مريت بالمرحلة دي وأنا بغني في الفترة اللي ما بين البلوغ وما بين الطفولة، دي فترة أنت صوتك مش لاقيه، مش عارف هو تخين ولا رفيع ولا صوتك مبحوح ولا صوتك محشرج.
واختتم حمادة هلال حديثه : بتمنى إنه يركز في دراسته لأن هو مطلع عيني في دراسته، فالله يهديه يارب، ونفسي يخرجلي عمل بعدين لأن أنا شايف فيه مخرج.
مسلسل المداح 6 - أسطورة النهاية
مسلسل المداح – أسطورة النهاية من تأليف أمين جمال، وإخراج أحمد سمير فرج، وبطولة حمادة هلال، ويشهد هذا الجزء عودة عدد من النجوم الذين شاركوا في أجزاء سابقة، أبرزهم فتحي عبدالوهاب، إلى جانب ظهور عدد من الفنانين كضيوف شرف، من بينهم أحمد السقا، يسرا اللوزي وحمزة العيلي، فضلاً عن مشاركة هبة مجدي، خالد سرحان، دنيا عبدالعزيز، حنان سليمان، وجمال عبدالناصر.
قصة مسلسل المداح – أسطورة النهاية
بعد أن فقد قدراته الاستثنائية فداءً لمن يحب، يجد صابر المداح نفسه أمام أصعب تحدياته على الإطلاق، حين يواجه سميح، المارد الغامض من أعماق العالم السفلي. في رحلة محفوفة بالمخاطر لاستعادة قوته، يخوض صابر معركة وجودية ضد قوى الشر، محاولًا كبح جماح الظلام ومنع طوفان الخراب الذي يهدد الجميع.
