حماده هلال : هعمل مع أحمد السقا مسلسل اسمه الشيخ ياسين
يواصل حماده هلال حديثه مع آخر خبر TV، عن مسلسل المداح، وتطرق لمشاركة أحمد السقا في الجزء السادس الذي يحمل إسم أسطورة النهاية، وظهوره بشخصية الشيخ ياسين.
وقال حماده هلال في تصريح خاص : أحمد السقا ربنا يكرمه ويسعده، ده أخويا وصاحب عمر ومن سنين، وممكن نكون إن إحنا مقربناش من بعض فترة طويلة كده، وتابع : أنا بعتبر السقا جبل ده غير إنه نجم كبير، وهو قدره عارفه كويس ودي ميزة فيه، لأن السقا لو جينا نتكلم عنه فهو تاريخ في السينما المصرية قولاً واحداً يعني.
كواليس مشاركة السقا في المداح 6
وأضاف : معانا نجوم كبار طبعاً أساتذتنا وإخواتنا، فكنا بنتكلم أنا وهو، فبقوله إيه ما تيجي معانا المداح؟ قالي يلا، قولتله تيجي لو جيبنا ضيف شرف وبتاع وصدقني هيبقى فيه فكرة جديدة، وأحمد سمير رسم شخصية كدة، قولتله طب كلمنا أحمد لقيناه جه لبس الشخصية، وبقى طاير من الفرحة بالشخصية جداً، وفضل قاعد في اللوكيشن معانا إحنا خلصنا تصوير وهو مش عايز يمشي، يعني أحمد والله العظيم من فرحته ومن حتى يعني كل المساعدين بتوعه كانوا موجودين وأول مرة نشوفه مبسوط كدة في اللوكيشن.
شاهد بالفيديو ..
نصحت السقا يقدم مسلسل الشيخ ياسين
وأكمل : واثق إن المشهد اللي هو طالع فيه والرسالة اللي بيدهالي أهم حاجة في المسلسل، واثق إن شاء الله يبقى خير وأساساً لما شوفت الكاركتر ده قولتله يا سقا أنت لازم تعمل مسلسل اسمه الشيخ ياسين، ولو السقا عمل مسلسل الشيخ ياسين أنا تحت الأمر، وأغنيله التتر ورباعيات وأي حاجة للسقا، ده أبو الرجولة كلها والله.
مسلسل المداح 6 - أسطورة النهاية
مسلسل المداح – أسطورة النهاية من تأليف أمين جمال، وإخراج أحمد سمير فرج، وبطولة حمادة هلال، ويشهد هذا الجزء عودة عدد من النجوم الذين شاركوا في أجزاء سابقة، أبرزهم فتحي عبدالوهاب، إلى جانب ظهور عدد من الفنانين كضيوف شرف، من بينهم أحمد السقا، يسرا اللوزي وحمزة العيلي، فضلاً عن مشاركة هبة مجدي، خالد سرحان، دنيا عبدالعزيز، حنان سليمان، وجمال عبدالناصر.
قصة مسلسل المداح – أسطورة النهاية
بعد أن فقد قدراته الاستثنائية فداءً لمن يحب، يجد صابر المداح نفسه أمام أصعب تحدياته على الإطلاق، حين يواجه سميح، المارد الغامض من أعماق العالم السفلي. في رحلة محفوفة بالمخاطر لاستعادة قوته، يخوض صابر معركة وجودية ضد قوى الشر، محاولًا كبح جماح الظلام ومنع طوفان الخراب الذي يهدد الجميع. صراعات داخلية وخارجية، تحالفات غير متوقعة، وأحداث تتصاعد بشكل مشوق، تجعل هذا الجزء الأخير من المداح أكثر إثارة وتشويقًا من أي وقت مضى.
