نصائح لنجاح ميزانية شهر رمضان .. شيماء فوزى الباحثة فى مجال الإدارة توضح
من أكثر المشاكل التى تواجه أغلب الأُسر فى شهر رمضان، هى وضع ميزانية مناسبة لراتب البيت خلال الشهر الكريم، ورغم نقص عدد الوجبات فى شهر رمضان، إلا أن هناك بنود كثيرة ترهق ميزانية أي أسرة، مثل العزومات وترندات الحلويات إلي جانب الديكور الرمضاني الشهير وبند الياميش والمكسرات.
ابعدي عن المقارنات والمبالغات فى شهر رمضان
وعن كيفية وضع ميزانية لشهر رمضان، تحدثت شيماء فوزي، الكاتبة والباحثة فى مجال الإدارة، فى حوار خاص لـ آخر خبر TV ، وقالت : تحديد الميزانية يبدأ بتقسيم المرتب على 4 أسابيع، يعني لو الدخل ألف جنيه، هنقسم مثلا 150 جنيه لكل أسبوع، طبعا اللي بقوله دا رقم افتراضي، تانى حاجة بعد تحديد مبلغ لكل أسبوع، إننا نبعد عن المبالغات والعزومات المستمرة والمقارنات.
عزومة واحدة للمقربين
وتابعت : العزومات المستمرة طول شهر رمضان مرهقة جداً لميزانية أي بيت، والحل إننا نعمل عزومة واحدة متحضرة كويس، أو نعمل ديش بارتي يعني كل أسرة يشاركوا بطبق وبيتم تكوين سفرة كبيرة فيها كل الأصناف، فى بيت أحد الأشخاص بدون إرهاق ميزانية شخص واحد.
اختارى أطباق كبيرة فى العزومة
وأضافت شيماء : ولو مضطرة تعملي عزومة اختارى المقربين زى الأولاد والأحفاد، أما بالنسبة للأطباق فأفضل تختارى الأطباق المباركة، بمعنى الأطباق المصرية زي صواني الفتة، دي بتكون اقتصادية وبتشبع، أو تشكيلة محاشى، كمان صواني الرقاق مهم أوى على سفرة رمضان، كل دي أصناف مصرية بتعمل عزومة كبيرة وتملى العين وبتكفى من غير صرف كتير.
اشترى حلويات مرتين فى الأسبوع
واختتمت : بالنسبة للمقارنات، بلاش تقارنى نفسك بصحبتك أو قريبتك ولا جارتك، لأن كل واحد عنده ظروف، ودا بيسبب لك مشاكل كتير أولها نفسيتك وفقدانك لشعور الرضا والسعادة بالنعم اللي ربنا أنعم عليكي بيها، ونصيحتي الأخيرة إننا نبعد عن المبالغة فى شراء الحلويات، يعني ممكن تشتريهم مرتين فى الأسبوع والأفضل تعمليها فى البيت أوفر وأحسن.
