أحمد سعد : اختياراتي في The Voice مش بإرادتي الكاملة وأكن الاحترام للقائمين على البرنامج
كشف أحمد سعد كواليس تصريحاته الأخيرة بشأن مشاركته في برنامج The Voice وتعرضه للخداع، مؤكدًا أن حديثه ليس هجومًا على البرنامج أو القائمين عليه، وأنه يكن احترامه الكامل للتجربة ولكل المشاركين فيها.
توضيح أحمد سعد بشان تصريحاته الأخيرة
وقال أحمد سعد في مقطع مسجل : كل الناس عمالة تسألني من امبارح علشان التصريح اللي أنا قولته عن اني اتخدعت، وعايز في البداية أقول إن أنا أكن كل الإحترام للقائمين على The Voice ولكل الناس اللي اشتركت من أصغر واحد لأكبر واحد، وده ملوش علاقة خالص بالشخصيات أو الصناع أو المواهب المشاركين.
أحمد سعد : غلطت في حق جمهوري ولو رجع بيا الزمن كنت هختار المواهب بشكل نزيه
وتابع : أنا طالع اتكلم عن نفسي شخصيًا، والناس أكيد بتسأل هو أنا لو كنت كسبت كنت طلعت قولت أن أنا اتخدعت برضو؟، حابب أوضح أن الموضوع ملوش علاقة بالمكسب أو الخسارة، وكل الناس تستحق، أنا بتكلم على الغلطات اللي أنا عملتها في حق نفسي وفي حق جمهوري زي المتسابق أحمد عوادي.
وأوضح : أنا بقالي أكتر من شهر بتشتم من الجمهور اليمني بسبب أحمد العوادي وكل الحب والتقدير للجمهور اليمني، مع أن فيه ناس غلطت بشكل غير مقبول، لكن بقولكم عندكم حق أنا غلطت في اختيارات كتير جداً جداً ومكنش المفروض أعمل كده، بس أنا محتاج أقول لجمهوري أن أنا اتخدعت وأنا اختارت اختيارات مش كلها بإرادتي الكاملة، وفيه مناخ وحاجات مينفعش أقولها أو أحكيها لأن دي حاجة ليها علاقة بالشغل وبالأدبيات بتاعه الشغل.
وأكد : حابب أقول أن أنا مكنش ليا ذنب ولو رجع بيا الزمن ألف مره كان فيه ناس زي أحمد عوادي وناس كتير أوي في البرنامج كان ممكن اختارها بشكل نزية وشريف بالنسبة لي.
أحمد سعد : لو رجع بيا الزمن مش هشترك في The Voice
واستكمل : أنا بصراحة مكنش المفروض اني أشترك في التجربة دي أصلا، والتجربة ليها كل التقدير وقد ايه هي حاجة عظيمة، لكن أنا بتكلم على شخصيتي وحبي للجمهور وعلى طريقة البرنامج لأنها مش مناسبة ليا أنا، وإني أظلم حد على حساب حد.
واختتم حديثه قائلًا : فيه سياسيات وثقافات أكبر مني، والمهم هو حبي لجمهوري وشفافيتي مع جمهوري، فعلشان كده أنا بعتذر، لكن أنا مش بغلط في أي حد ولا بتكلم على أي حد ولا بقول على أي حد أنه عمل حاجة غير لائقة أو غير قانونية.
